اسلام آباد ۔ 6 اگست (اے پی پی) چین پاکستان اقتصادی راہدای ڈٹ انا رداٹ ڈیرہ اسماعیل خان، ہکلہ موٹر وے نا جوڑ جاڑی کاریم ترندی اٹ برجاءِ ۔ محکمہ قومی شاہرات نارداٹ 285 کلومیٹر مریس ڈیرہ اسماعیل خان۔ہکلہ موٹر وے چین پاکستان اقتصادی راہداری نا بشخ اسے ۔ داموٹر وے اینخو نا مالی سال نا ایسر اسکان 129 ارب روپئی نا خڑچ آن پورو مریک ۔ موٹر وے آن ڈیرہ اسماعیل خان و بلوچستان اٹی واپاری و کاروباری سرجزآک ترند مریرہ ۔ ڈٹ انا بروخت پوروی ءِ المی جوڑ کننگ کن ہکلہ۔ڈیرہ اسماعیل خان موٹر وے ءِ یارک۔رحمانی خیل سیکشن، رحمانی خیل۔کوٹ بیلیاں سیکشن، کوٹ بیلیاں۔تراپ سیکشن، تراپ۔پنڈی گھیب سیکشن وپنڈی گھیب۔ہکلہ انٹرچینج سیکشن تون اوار پنچ سیکشن آتیٹی بدل کننگانے ۔ اقتصادی راہداری ہڑتوم آ ملک آتا نیام اٹ اہم انگا بشخ آتیٹی کمکاری آمبنی گام گیج و ڈٹ آتا جامع پیکج ءِ ہراٹی احوال نیٹ ورک، بنداوی ڈھانچہ، توانائی، صنعت ، کشت و کشار، سیل و سوات و چندی ایلو بشخ آک اوار ءُ ۔ پاک چین کمکاری نا داڈٹ آتا پوروی آن پاکستان شونداری نا کسر تیٹی اہم ءُ مزل اسے آ سرمریک ۔ ہراتم دا ڈٹ ایسری ءِ سرمریک تو اسہ بدلینگوک ءُ پاکستان اس مون آ بریک ہرانا الس ءِ توانائی‘ مواصلات‘ ہن و بر ‘ صنعت و حرفت‘ کاروبا ر‘ روزگار‘ سیل و سوات و بے شمار اقتصادی شونداری نا آسراتی و وارخواہی دوبریک و پاکستان اقوام عالم اٹ شون ہلوک ملک آتا صف اٹ سلک ۔
