نگران وزیر خزانہ و ڈٹ بندی شونداری و اصلاحات ڈاکٹر شمشاد اختر نا پلاننگ کمیشن اٹی پائیدار شونداری ہدف آتا بابت سیمینار آن تران

اسلام آباد ۔ 2 اگست (اے پی پی) نگران بنجائی وزیر خزانہ و ڈٹ بندی، شونداری و اصلاحات ڈاکٹر شمشاد اختر پارینے کہ آئی ایم ایف نا پروگرام آ کاریم برجاءِ ، بروک آ حکومت ءِ دابابت معلومدار کینہ ، داوخت آ زرمبادلہ نا کوڑی دہ ارب سی کروڑ ڈالر آن زیات ءِ ، دمدستی وڑاٹ پیشن نا ادائیگی تا ہچ ءُ مسئلہ اس اف ولے بروک آ سہ ماہی ٹی درملکی ادائیگی تا بھاریم ودک ۔داخیال آتا درشانی ءِ اوپلاننگ کمیشن اٹی پائیدار شونداری ہدف آتا بابت سیمینار آن تران و داوخت آ میڈیا تون ہیت وگپ کرسا کرے ۔ اوپارے کہ نن داوخت معاشی نزوری نا نازرک ءُ دور اسے آن گدرینگ انگ اُن ، کرنٹ اکاؤنٹ نسخان و بجٹ نسخان ملکی تاریخ نا بڑزکو انگا کہول آٹی ءِ ۔ اوپارے کہ معاشی ٹک آتا سوگوی کن آئی ایم ایف تون کمک المی ءِ ولے آئی ایم ایف پروگرام ءِ بیل آؤٹ پیکج پاننگ سہی اف ۔