اسلام آباد ۔ 2 اگست (اے پی پی) پاکستان تحریک انصاف بلوچستا ن ناصدر سردار یار محمد رند وپی ٹی آئی نا راہشون نعیم الحق پنچ شنبے نادے بلوچستا ن ہاؤس اٹی بلوچستان نیشنل پارٹی (مینگل) نا سروک سردار اختر مینگل تون اوڑدہی کریر ہراٹی حکومت سازی نا بابت خیال آتا درشانی ءِ کننگا ۔ تحریک انصاف نا راہشونک سردار اختر مینگل ءِ پاکستان تحریک انصاف نا چیئرمین عمران خان تون اوڑدہی نا سلہ خلکر ۔ پی ٹی آئی ڈل اتون اوڑدہی آن پد میڈیا تون ہیت وگپ کرسا سردار اخترمینگل پارے کہ اتحاد اٹی شمولیت نا سلہ غا تحریک انصاف نا ڈل انا منت وار اُٹ ، پی ٹی آئی آن جوان ءُ ورندی اس ملانے ۔ اوپارے کہ نن تحریک انصاف نا مون آ بلوچستان نا ویل آتے تخانن ، بے گواہ بندغ آتا بازیابی و سی پیک آ عملدرآمد نا ہم نن خواست ءِ کرینن لہٰذا ننے جوان ءُ ورندی اس ملا تو ساتھ تننگ کن تیار اُن ۔ بلوچستان نا وزارت اعلیٰ نا بابت اسہ سوج اسے آ اوپارے کہ جے یو آئی اتحادی ءُ جماعت اسے ، حکومت یا اپوزیشن اٹ تولنگ نا فیصلہ ءِ اواری اٹ کینہ ۔ تحریک انصاف نا راہشون نعیم الحق خواست آتے عمران خان نا مون آ تخنگ نا یخین دہانی کرفسا پارینے کہ عمران خان اولیکو لیڈر مریک ہرا بلوچستان نا ویل آتے ایسر کیک ۔ یار محمد رند پارے کہ اختر مینگل نا خواست آتے عمران خان نا مون آ تخنہ ، یخین ءِ کہ عمران خان تون اوڑدہی آن پد اختر مینگل ناجماعت و نن اوار مرینہ ۔
