نگران وزیراعظم جسٹس(ر) ناصرالملک نااین آئی ایچ نادورہ نا وخت آ خیال آتا درشان

نگران وزیراعظم جسٹس(ر) ناصرالملک نااین آئی ایچ نادورہ نا وخت آ خیال آتا درشان
قومی ادارہ جان جوڑی الس ءِ جان جوڑی نا آب اٹنگا خذمت آتا فراوانی ٹی ستاء کڑزوک کڑد ادا کننگ ءِ
اسلام آباد۔ 2 اگست (اے پی پی) نگران وزیراعظم جسٹس(ر) ناصرالملک قومی ادارہ جان جوڑی (این آئی ایچ) نا صوبہ غاتون اشتراک کارءِ ودفنگ و جان جوڑی نا بابت معاملہ و نا جوڑی تا بارواٹ السی شعور تالان کننگ نا گرج آ زور شاغانے ، قومی ادارہ جان جوڑی ملک انا الس ءِ جان جوڑی نا آب اٹنگا خذمت آتا فراوانی ٹی ستاء کڑزوک کڑد ادا کننگ ءِ ۔وزیراعظم دا خیال آتا درشانی ءِ پنچ شنبے نادے آ قومی ادارہ جان جوڑی (این آئی ایچ ) نا دورہ نا وخت آ کرے ، وزیراعظم اسہ احوال اسے نا کماشی ءِ ہم کرے ، احوال اٹی وزیراعظم ءِ نیشنل ہیلتھ کیئر اٹی قومی ادارہ جا ن جوڑی نا کڑد ، ادارہ نا وڑوڈول و آخبت نا ڈٹ آتا بارواٹ معلومدار کننگا ۔نیشنل ہیلتھ سروسز ریگولیشنز وکوارڈی نیشن نا بنجائی وزیرپروفیسرمحمد یوسف شیخ وبنجائی سیکرٹری جان جوڑی ئسک ہم داوخت آ ساڑی ئسر ۔وزیراعظم داوخت آ پارے کہ قومی ادارہ جان جوڑی پبی استعدادتخوک ءُ ادارہ اسے و گرج دا ہیت انا ءِ کہ دادے پین شون تننگے تانکہ ملک اٹی دا جان جوڑی نا اسہ اہم ءُ ادارہ سے نا حیثیت اٹ خذمت سرانجام تننگ کے ہراڑے ادارہ نا تینٹ تیار کروک آ ویکسین آک مریر و داڑے پٹ وپول و شونداری نا آسراتی دوبرے ۔وزیراعظم قومی ادارہ جان جوڑی نا کنڈآن ملک انا جان جوڑی نا اولیکو ایکٹ نا مسودہ نا تیاری نا گام گیج آتا ستاءِ کرے وزارت جان جوڑی ءِ داعمل ءِ ترند کننگ نا پارت کرے تانکہ بروک آ جوڑ مروک آ حکومت ءِ دارداٹ المی کانود جوڑ کننگ اٹ آسراتی مرے ۔وزیراعظم قومی ادارہ جان جوڑی نا خذمت آتا ستاءِ کرے و پارے کہ داادارہ ملک انا الس ءِ جان جوڑی نا آب اٹنگا خذمت آتا فراوانی ٹی ستاء کڑزوک کڑد ادا کننگ ءِ ۔