اسلام آباد ۔ یکم اگست (اے پی پی) نگراں وزیر خارجہ عبداللہ حسین ہارون پارینے کہ آئی ایم ایف پیکج و چین انا بابت امریکہ نا بیان نا مناسب ءِ ،آئی ایم ایف پیکج ءِ سی پیک تون گنڈنگ سہی اف ۔آئی ایم ایف آ ہِننگ نگران حکومت نا مینڈیٹ اف ،پوسکن گچین مروک آ حکومت دابارواٹ تینا پالیسی اس جوڑ کیک ۔ پاکستان ءِ امریکی امداد نا ضرورت اف،پاک چین دوستی آ ہچ گہس ءِ نیام تمنگ نا ضرورت اف ،اسٹ اس ہم سی پیک اٹی اڑاند مننگ کپک ۔چارشنبے نادے داڑے پریس کانفرنس آن تران کرسا نگراں وزیر خارجہ پارے کہ آئی ایم ایف پیکج نا بابت امریکی بیان نا مناسب ءِ وخت اس کہ آئی ایم ایف پیکج ءِ سی پیک اتون گنڈنگ سہی اف ۔اوپارے کہ پاک چین سنگتی آ ہچ گہس ءِ نیام تمنگ نا ضرورت اف ۔چین پاکستان اٹی ارب آ ڈالر نا زرکاری کننگ ءِ وخت اس کہ چینی صدر شی جن پنگ پاکستان ءِ تینا ارٹ میکو اُراسمجھک ۔اوپارے کہ امریکہ نا کنڈآن بھارت نا دفاع ءِ گچین کننگ کن نئی دہلی ءِ انفرادی لیسن جاری کننگانے و دا ہمووخت آ کننگ انگ ءِ وخت اس کہ امریکہ ءِ ننے پیسہ تروئی ءِ ۔ بھارت ءِ امریکہ نا کنڈآن انفرادی وڑاٹ پوسکن آ سلہہ غاتا لسین تننگانے ۔امریکہ ءِ سیوتی فنڈز انا مد اٹ پاکستان ءِ ادائیگی کروئی ءِ ۔نن امریکہ غان ہراتم تینا پیسہ غاتے خوانہ تو او پاہک کہ ننتون پیسہ اف ۔اوپارے کہ آئی ایم ایف پیکج نا سی پیک اتون ہچ ءُ تعلق اس اف ۔
