پاک فوج اناسروک جنرل قمر جاوید باجوہ نا کماشی ٹی کورکمانڈر کانفرنس ، الیکشن کمیشن نا کمکاری آ آرمی الیکشن سپورٹ سینٹر نا ستاءِ کننگا ، گچین کاری عمل اٹی شہید و ٹھپی مروک آتے خراج تحسین پیش کننگا

راولپنڈی۔ یکم اگست (اے پی پی) پاک فوج انا سروک جنرل قمر جاوید باجوہ ناکماشی ٹی کورکمانڈر کانفرنس اٹی الیکشن کمیشن ناکمکاری آآرمی الیکشن سپورٹ سینٹر نا ستاءِ کننگا وخت اس کہ گچین کاری عمل اٹی شہید و ٹھپی مروک آتے خراج تحسین پیش کننگا۔ پاک فوج اناشعبہ تعلقات عامہ(آئی ایس پی آر) نارداٹ 212می کور کمانڈر کانفرنس چارشنبے نادے جی ایچ کیو راولپنڈی ٹی آرمی چیف جنرل قمر جاوید باجوہ نا کماشی ٹی اڈ ہلک ۔فورم جیو اسٹریٹجک حالیت،علاقائی امن وملک اناداخلی سکیورٹی نا حالیت آتا جاچ ءِ ہلک ۔آرمی چیف کورکمانڈرز ءِ پارت کرے کہ دہشت گردی وعسکریت پسندی نابرخلاف کوشست آتے برجاتخنگے ۔کورکمانڈر کانفرنس علاقائی سلامتی کن اوغانستان پاکستان ایکشن پلان فار پیس اینڈ سٹیبلٹی (اے پی اے پی پی ایس) نارداٹ اوغانستان تون فوجی کہول انا ہیت وگپ اٹ پیش رفت آ است جمی نا درشانی ءِ کرے ۔فورم الیکشن نا اڈتننگ کن تروک آ مینڈیٹ نا رداٹ آرمی الیکشن سپورٹ سینٹر وفیلڈ فارمیشنز نا کنڈآن الیکشن کمیشن ءِ کمک فراوان کننگ نا عمل نا ستاءِ کرے ۔فورم گچین کاری عمل اٹی شہید و ٹھپی مروک آتے خراج تحسین پیش کننگا۔ گچین کاری عمل اٹ بشخ ہلنگ وسلہہ بند فوج انا سپورٹ آپاکستان نا دلیر الس نا منت واری ءِ ہرفنگا۔