چیئرمین نیب جسٹس جاوید اقبال نا کماشی ٹی نیب ہیڈ کوارٹرز اٹی اسہ بڑزکو کہول انا دیوان اس

نیب انا وڈی خوری ٹی اوار مبینہ دوبہ دارآتے دزگیری کن جوڑکروک آ پالیسی نا جاچ ءِ ہلنگا
اسلام آباد ۔ 31جولائی (اے پی پی) قومی احتساب بیورو ناچیئرمین جسٹس جاوید اقبال نیب ہیڈ کوارٹرز اٹی اسہ بڑزکو کہول نا دیوان اسے نا کماشی ءِ کرے ۔ دیوان اٹی نیب انا وڈی خوری ٹی اوار مبینہ دوبہ دارآتے دزگیری کن جوڑ کروک آ پالیسی نا جاچ ءِ ہلنگا ۔ چیئرمین نیب پارے کہ نیب دوبہ دارآتا دزگیری کن ہچ ءُ امتیازی پالیسی سے آ باور کپک بلکن بے پرخ ، ٹھوس شاہدی و کانود نا رداٹ مبینہ دوبہ دارآتا دزگیری عمل اٹ اتنگک ۔ اوپارے کہ نیب وڈی خوری ٹی مبینہ دوبہ دار نا دزگیری نا وخت نئے بیرہ دوبہ غاتا سنگین نوعیت، دوبہ دار نا وڈی خوری ٹی میں مبینہ کڑد ، دزگیری نا سوب آک خاص کر دوبہ دار نا ملک آن نرنگ نا خلیس تون اوار غٹ پلو آتا کانود نا رداٹ جاچ ءِ ہلسا دوبہ دار ءِ دزگیر کیک ۔ اوپارے کہ دوبہ دار نا دزگیری آن پد اودے تعلقدار احتساب عدالت اٹ پیش کرسا نیب دوبہ دار آ خلوک آ دوبہ غاتا پورو سرجمی اٹ شرفمند آ احتساب عدالت ءِ معلومدار کیک ہرانا بنداو آ تعلقدار شرفمند آاحتساب عدالت دوبہ دار نا پین جاست وپاست کن نیب ءِ ریمانڈ ایتک ۔ نیب ریمانڈ اٹی دوبہ دارآن سائنسی بنداو تیا ٹھوس شاہدی و کانود نا رداٹ جاست وپاست کیک ۔ جاست وپاست آن مست و جاست وپاست اٹی نیب دوبہ دار ءِ تینا صفائی نا پورو موقع فراوان کیک ۔ اوپارے کہ نیب کم پیسہ والا مقدمہ غاتیا تینا توانائی تے خڑچ کننگ نا جاگہ غا بھلا بھلا میگا سیکنڈلز آتاجاست وپاست ءِ اولیت تننگ ءِ ہرانا سوب وڈی خوری ٹی مبینہ وڑاٹ اوار بھلا مچھی تیا کانود نا رداٹ دُو شاغنگک ۔ اوپارے کہ ہرمقدمہ ٹی دزگیر دوبہ دار نا برخلاف 90 دے اٹی نیب وڈی خوری نا ریفرنس تعلقدار احتساب عدالت اٹ کانود نا رداٹ دائر کیک و داچرجوئی ٹی ڈیوالائی کروک آ نیب آفیسر آتا برخلاف سخت کارروائی عمل اٹ اتنگک ۔