اسلام آباد ۔ 31جولائی (اے پی پی) پاک بحریہ ناوائس چیف آف نیول اسٹاف ، وائس ایڈمرل کلیم شوکت رشین فیڈریشن نیوی ناکمانڈراِن چیف ایڈمرل ولادیمیرایوانوِ چ کورولیوتون اوڑدہی کرے ۔ترجمان پاک بحریہ نارداٹ اوڑدہی ٹی کسبی معاملہ ، ہڑتوم آ کنڈآتابحری اشتراک و بحرِ ہند نا سکیورٹی حالیت آتیا خیال آتا درشانی کننگا ۔ہڑتوم آ ملک آتا بحری فوج آتانیام اٹ ہڑتوم آ کنڈآتا کمکاری نا کیہی بشخ آتیا ہم ہیت وگپ کننگا ۔وائس ایڈمرل کلیم شوکت بحر ہند اٹی امن و سوگوی ءِ المی جوڑ کننگ اٹ حکومتِ پاکستان نا پالیسی تا رداٹ دہشت گردآتابرخلاف جنگ اٹی پاکستان نا عزم و کارکڑدگی بشمول علاقہ نا میری ٹائم سیکورٹی ٹی پاکستان نیوی نا کڑد ءِ مون آ تخا۔رشین فیڈریشن نیوی نا کمانڈراِن چیف ڈیہہ ٹی بحری امن و سوگوی ٹی پاک بحریہ نا کڑد و خذمت آتا ستاءِ کرے ۔اوڑدہی آن پد اسہ اہم ءُ دود اس اڈ ہلک ہراٹی وائس چیف آف نیول اسٹاف ورشین فیڈریشن نیوی نا کمانڈراِن چیف بحری بشخ اٹی تین پہ تینی کمکاری نا مفاہمتی یات داشت آ دستخط کریر۔بحری کمکاری نا دامفاہمتی یات داشت نا سرسہب ایسری نا ستاءِ کرسا ہڑتوم آ شخصیت آک دا ہیت انا درشانی ءِ کریر کہ دا مفاہمتی یات داشت ہڑتوم آ ملک آتا نیام اٹ ساڑی تین پہ تینی بحری اشتراک اٹ پین ودکی نا سوب مریک ۔ دورہ ٹی، وائس ایڈمرل کلیم شوکت نیول شپ یارڈ ورشین نیوی نافریگیٹ ایڈمرل ماکاروو(Makarov)نادورہ ءِ کننگ تون اوار اوار ر شین فیڈریشن نیوی ڈے انا وخت آ اڈ ہلوک آ نیول پریڈ اٹی ہم شرکت کرے ۔ داکان مست ، سینٹ پیٹرز برگ بندرگاہ دورہ ٹی پاک بحریہ نا جہاز اصلت نا کنڈآن جہاز آ اسہ ضیافت اسے نا بست و بند کننگا ہراٹی درملکی و ہندی شخصیت آک شرکت کریر ۔پاکستان و روس انا نیام اٹ تعلقداریک اریر۔پاکستا ن وروس انا سوگو شریداری ڈیہہ ٹی امن ، سوگوی و کمکاری ٹی اہم کڑد ادا کننگ نا سوب جوڑ مریک ۔وائس چیف آف نیول اسٹاف نا دا دورہ ہڑتوم آ ملک خاص کر ہڑتوم آ ملک آتا بحری فوج آتا نیام اٹ اشتراک اٹی گیشتری و ودکی نا سوب مریک ۔
