اسلام آباد ۔ 31جولائی (اے پی پی) الیکشن کمیشن گڑاس سیاسی جماعت آتا کنڈآن الیکشن کمیشن نا استیفہ تننگ نا خواست ءِ یکسر مسترد کرسا پارینے کہ بیدس شاہدی نا صاف، شفاف و گچین کاری تا اڈتننگ آ اعتراض کننگ بے بنداو و من گھڑت ءِ ، مچ آملک آن دھاندلی نا ہچ ءُ غاو اس ملتنے ، الس نا مینڈیٹ نا شرف ءِ کپننگ جمہوریت نا منافی ءِ ،اگہ کس اسے نا غاو ہرے تو اونا ازالہ کن کانود اٹی تروک آ کسر ءِ بایدے ہلوئی مرے ، آر ٹی ایس نا بے سہبی نا بابت سوب آتا جاچ ءِ ہلسا ذرائع ابلاغ تون شیئر کینہ ،باتروک آ اومیت دار آک تینا باتننگ ءِ امنا کیر، اومیت ءِ کہ غٹ جمہوری واکدار و بندغ آک تینا جندی فائدہ غاتے پدی تخسا آئین، کانود و جمہوریت نا بالادستی کن آئینی ادارہ غاتیا نئے بیرہ بے سوب تنقید آن پاناد بلکن اسہ سوگو ءُ جمہوری پاکستان اسے کن تینا کڑد ءِ ادا کیرہ ۔ سے شنبے نادے الیکشن کمیشن اٹی پریس کانفرنس آن تران کرسا سیکرٹری الیکشن کمیشن بابر یعقوب فتح محمد آل پارٹیز کانفرنس نا ایسری آ گڑاس سیاسی راہشون تا کنڈآن جاری کروک بیان کہ ’’الیکشن کمیشن ءِ استیفہ تروئی مرے ‘‘ آ است ہسونی نا درشانی ءِ کرے و داخواست ءِ یکسر مسترد کرے ۔ اوپارے کہ صاف، شفاف وغیر جانبدار گچین کاری تا بارواٹ بیدس شاہدی نا داوڑنا بیان آک است ہسونی و حق آتا منافی ءُ ۔ لس گچین کاری 2018ء ٹی الس آزادانہ چاگڑد اٹ تینا حق رائے دہی ءِ کاریم اٹ ایسور و مچ آ ملک آن الیکشن اٹی دھاندلی نا بابت داوخت اسکان ہچ ءُ غاو اس رسینگتنے ۔ اوپارے کہ پاکستانی الس نا مینڈیٹ نا بیدس سوب وجندی فائدہ غاتا بنداو آ شرف ءِ کپننگ جمہوریت نا بنداوی اصول آتا منافی ءِ ۔ الیکشن کمیشن داہم صفا کننگ خواہک کہ اگہ اومیت دار اسے حلقہ یا پولنگ اسٹیشن نا بابت غاو ہرے تو اونا ازالہ کن کانود اٹی تروک آ وڑوڈول نا رداٹ کسر ءِ اختیار کیر ۔ اوپارے کہ الیکشن کمیشن غٹ سرسہب و باتروک اومیت دار آتیان اومیت کیک کہ تو السی رائے نا شرف ءِ کرسا گچین کاری نتیجہ غاتے نئے بیرہ امنا کیرہ بلکن جمہوری عمل نا تسلسل کن تینا گچین کڑد ءِ ادا کیرہ ۔ الیکشن کمیشن داہم سمجھک کہ ساڑی آ گچین کاری تا شفافیت و غیر جانبداری داہیت آن ہم ظاہر مریک کہ ملک اناطول و عرض اٹ لس گچین کاریک 2018ء ناپرامن اڈ ہلکر ہراٹی ووٹرآتا بھلو کچ اس تینا حق رائے دہی ءِ آزادانہ وڑاٹ استعمال کریر ۔ لس گچین کاری 2018ء نا شفافیت و اونا آزادانہ، منصفانہ وغیر جانبدارانہ اڈتننگ نا جاچ ءِ ہلنگ کن کم و ود 30 ہزار مبصر بشمول 400 جہانی مبصر و میڈیا، 19 ہزار فافن نا مبصر و ملکی میڈیا نانمائندہ غاک مچ آ ملک اٹی گچین کاری عمل نا کیہی مرحلہ غاتا غور اٹ جاچ ءِ ہلکر و تینا بنائی رپورٹ آتیٹی یورپی یونین، دولت مشترکہو فافن مبصرآک لس گچین کاری 2018ء ءِ آزادانہ، منصفانہ وغیر جانبدارانہ گوندار ہراکہ پاکستانی قوم انا اسہ ایک جمہوری ءُ فتح اس و شرف انا ہیت اسے ۔
