اسلام آباد ۔ 31جولائی (اے پی پی) پاکستان اٹی جرمنی ناسفیرمارٹن کوبلر پارینے کہ پاکستان نا پوسکن آ حکومت ءِ تعلیم ، جان جوڑی ، بے روزگاری وچاگڑدی بدلی تتون اوار کیہی چیلنج آتون مون تروئی تمنگ کیک وجرمنی غٹ بشخ آتیٹی پاکستان تون کمکاری کن تیار ءِ ۔راجی میل جول نا ویب سائیٹ ٹوئٹرآجاری تینا ویڈیوکلہو اٹی اوپارے کہ پاکستان ءِ اسہ سوگو ءُ حکومت اسے نا گرج ءِ و جرمنی ہروڑنا حالیت آتے ٹی پاکستان تون سلوک ءِ ۔اوچیلنج آتا باوجود ساڑی آ گچین کاری تیٹی خلقت نا بھلو کچ اسے ٹی بشخ ہلنگ و جمہوریت ءِ سوگو کننگ آ پاکستانی الس نا ستاءِ کرے و پارے کہ گچین کاری تا دے کوئٹہ ٹی دہشت گردی نا جلہو نا باوجود پاکستانی الس نا عزم نزور متو و اوگچین کاری عمل اٹی بشخ ہلکر ۔اوکوئٹہ ٹی دہشت گردی نا جلہو اٹی تپاخت کروک بندغ آتا خاہوت آتون ہمدردی نا درشانی ءِ کرے و ملک اکن جان تا قربانی تننگ آ سلہہ بند فوج انا ورناتے شاندار خراج عقیدت پیش کرے ۔
