اسلام آباد۔ 05دسمبر (اے پی پی) وزیراعظم محمد نواز شریف خودانحصاری نا بنداو آ دیامربھاشاڈیم انا فنانسنگ پلان نا اصولی منظوری ئِ تسنے۔ جدت نا حامل دا ڈٹ ئِ سیکرٹری دیر و بجلی دوشنبے آ وزیراعظم ئِ پیش کرے ہراٹی سرکاری بشخ انا شونداری پروگرام (پی ایس ڈی پی) نا رداٹ تخوک زر و واپڈا آن دوئی مروک آ وسیلہ غاتیان دا ڈٹ انا ڈیم انا بشخ اکن سرمایہ نا فراوانی تجویز کننگانے وخت اس کہ بجلی نا پیداوار نا بشخ اکن ایلو سرمایہ نا بست و بند ئِ وزارت دیر و بجلی واپڈا نا کمک اٹ یا تینا ساڑی آ ڈٹ آتا لیزنگ نا کمک اٹ واپاری بنداو تیا کیک۔ وزیراعظم سیکرٹری دیر و بجلی ، سیکرٹری ڈٹ بندی و سیکرٹری خزانہ ئِ پارت کرے کہ مالیاتی تجویز ئِ زوت گڈیکو دروشم تننگے۔ اوسیکرٹری دیر وبجلی ئِ داہم پارت کرے کہ 2017ءنا ایسرمننگ آن مست ڈیم آ فزیکل ورک انا بنائِ کننگ کن تیاری تا بنائِ کننگے۔ وزیراعظم داہیت انا ہم ستائِ کرے کہ ڈیم اکن ڈغار نا دوئی وزارت و گلگت بلتستان انتظامیہ نا کوشست آتیان ایسری اسکان رسینگانے۔ یات سلے کہ مشترکہ مفادات کونسل 2009 ءٹی دیامربھاشاڈیم انا جوڑ جاڑ نا منظوری ئِ تسوسس۔ کثیر الجہتی ڈونرزآتا کمک اٹ زرانا فراوانی کن کوشست آتیٹی بھاز زیات وخت خڑچ مننگ ئِ و پاکستان ئِ دیر انا کاختی نا مون ئِ توننگ نا چیلنج آتون مون تننگ کن دمدستی وڑاٹ دیر کوڑی کننگ نا گنجائشت ئِ ودفنگ نا گرج ئِ۔ ساڑی آ ڈیم تا کوڑی نا گنجائشت مش جمع مننگ نا بناءآ ترندی اٹ کم مننگ ئِ و خشک سالی نا سوب ملک انا کشاری پیداوار اٹی ہم ہرمنہ سال پد کمتی بننگ ئِ ہنداخاطران پین آبی کوڑی تا جوڑ جاڑ نا سخت گرج ئِ۔ دیامر بھاشا ڈیم جم وڑاٹ 8.1ملین ایکڑ فٹ دیر کوڑی کننگ کیک ہرافتے آن 64لکھ ایکڑ فٹ براہ راست کوڑی مریک و داڑآن 4500 میگاواٹ ہڑزان و چاگڑد دوست بجلی ودی مریک۔
