کوئٹہ۔ 14اکتوبر (اے پی پی) صوبائی سلاہکار اطلاعات سردار رضا محمد بڑیچ مچ آ صوبہ ٹی عاشورہ محرم نا جلوس آتا پرامن اڈتننگ آ است جمی نا درشانی ئِ کرسا انتظامیہ، پاک فوج، پولیس، ایف سی و کانود نافذ کروک آ ادارہ غاتا کنڈآن کروک آ گچین رکھی گام گیج آتا ستائِ کرسا اونا پرامن چاگڑد اٹی ایسر مننگ ئِ خوش آئند گوندانے۔ اوعاشورہ محرم نا وخت آ جتا مکاتب فکر انا عالم ، سیاسی و راجی کسرشون و الس نا جتا تپہ غاتا کنڈآن امن و ایمنی ئِ برقرارتخنگ و تین پہ تینی مذہبی برادری و ایلمی نا درشانی ئِ کننگ آ اوفتے مبارکبادی تسنے۔ صوبائی سلاہکار اطلاعات پارے کہ حکومت عاشورہ محرم نا وخت آ الس نا کمکاری آن پرامن چاگڑد ئِ برقرار تخنگ کن گچین گام گیج کرے ہرانا نتیجہ ٹی مچ آ صوبہ ٹی عاشورہ محرم نا جلوس، مجالس و ایلو مذہبی اجتماعات نا نہ صرف پرامن چاگڑد اٹی انعقاد ممکن مس بلکن داوخت آ محرم الحرام نا تقدس و ایلمی نا چاگڑد ئِ پوروی وڑاٹ برقرارتخنگا ہراکہ اسہ مثبت روایت اسے۔
