باکو۔14اکتوبر(اے پی پی) وزیراعظم محمدنواز شریف پارینے کہ پاکستان و آذربائیجان ہم آہنگ تصورات آتا کمک اٹ اسہ وڑنا خیال تخرہ ، نن سمجھنہ کہ غٹ علاقائی و جہانی ویل آتے بین الاقوامی کانود نا فریم ورک نا رداٹ ہیت وگپ و پرامن ذرائع اٹ ایسر کروئی مرے۔ اوداہیت ئِ آذربائیجان نا صدر الہام علیوف تون اوار جمعہ آ داڑے مشترکہ پریس کانفرنس آن تران کرسا پارے۔ وزیراعظم پارے کہ او ایلوتا کنڈآن کھلی جارحیت نا باوجود پرامن ہمسائیگی و شون اکن امن و ترجمان مسنے واہم امن نا اصول آتیا کاربند سلنگ نا غلط مطلب ہلسا اودے نزوری تکنگپ۔ وزیراعظم پارے کہ پاکستان و آذربائیجان نا جموں و کشمیر و نگور نو کاراباخ نا ویل آ اسہ ایلو کن مخ تفی، خڑکی ، افہام و تفہیم و خیال آتیٹی ہم آہنگی نا ثبوت ئِ۔ نگورنوکاراباخ آ پاکستان نا موقف نا اعادہ ئِ کرسا وزیراعظم محمد نواز شریف مقبوضہ آذری علاقہ غاتا واپسی، آرمینین فوج انا انخلا و مہاجر آتا پدی ہِننگ نا خواست کرے۔ وزیراعظم تنازعہ جموں و کشمیر آ پاکستان کن آذربائیجان نا مخ تفی نا ستائِ کرے ہرا اقوام متحدہ سلامتی کونسل نا قراردادآتا رداٹ ہیت وگپ و پرامن ذرائع اٹ ویل انا ایسری آ زورشاغک۔
