باکو۔ 14اکتوبر (اے پی پی) وزیراعظم محمدنواز شریف آذربائیجان نا صدر الہام علیوف تون وسیع تر ہڑتوم آ کنڈآتا تعلقداری تا بارواٹی درشانِ خیال کریر ہراٹی ہڑتوم آملک آتا نیام اٹ سوگو اقتصادی و زرکاری رابطہ غاتے استوار کننگ آ زورشاغنگا۔ جمعہ آ داڑے ڈل انا کہول آ مذاکرات آن مست ون آن ون اوڑدہی ٹی وزیراعظم پاکستان و آذربائیجان نا نیام اٹ سنگتی و کمکاری نا ساڑی آ رشتہ غاتے واپاری و زرکاری نا پوسکنا رابطہ غاتیٹی شاغنگ نا خواہش نا درشانی ئِ کریر۔ اوآذربائیجان نا صدر ئِ تینا حکومت نا توانائی ، بنداوی ڈھانچہ و بجلی نا ڈٹ آتا بارواٹی معلومدار کرے ہرا 46ارب ڈالر خڑچ انا پاک چین اقتصادی راہداری نا رداٹ پورو کننگ انگ ئُ و داڑآن نیامی ایشیائی ریاست آتا زرکار آتے کن ہم زرکاری نا بے شمار وارخواہی ساڑی ئِ۔ وزیراعظم محمدنواز شریف پارے کہ اونا حکومت مشترکہ شونہالی نا کمک اٹ گیشتر علاقائی رابطہ غاتے کن پرعزم ئِ و غٹ نیام ایشیائی ریاست آتون سوگو رابطہ غاتے استوار کننگ ئِ۔ ہڑتوم آ کنڈآک بین الاقوامی معاملہ، سویلی ایشیاءنا حالیت خاص کر جموں و کشمیر نا بارواٹی ہم درشانِ خیال کریر۔ پاکستان و آذربائیجان تینا خڑکی سیاسی تعلقداری تے غٹ بشخ خاص کر معیشت، واپار، زرکاری، توانائی و دفاع نا پٹ اٹی ٹھوس کمکاری ٹی بدل کننگ نا عزم انااعادہ کریر ۔ وزیراعظم جموں کشمیر نا تنازعہ غا آذربائیجان نا پاکستان کن مخ تفی نا ستائِ کرے۔ داکان مست صدر الہام علیوف وزیراعظم نا صدارتی ماڑی آ بننگ آ جم و جوش اٹ خیر مقدم ئِ کرے و اودے گارڈآف آنر پیش کننگا۔
