اسلام آباد۔ 14اکتوبر (اے پی پی) مسکوہی سفیر مشتاق مہر پارینے کہ وزیراعظم محمد نواز شریف نا آذربائیجان نا دور ہ آن علاقائی تعلقداری تے مون آ دننگ و سیاسی ہم آہنگی ودی مریک۔ ریڈیو پاکستان نا پروگرام نقطہ نظر اٹی ہیت وگپ کرسا اوپارے کہ وزیراعظم پاکستان نا دورہ باکو خوش آئند ئِ و اوڑآن پاکستان نا گچین خارجہ پالیسی نا اِرا اہم پلو تالان مریرہ اولیکو داکہ وزیراعظم نا آذربائیجان نا دورہ آن نیامی ایشیائی ملک آتون تعلقداری تے پین مون آ دننگک انتئے کہ دا ملک آتیان ننا دودوربیدہ ہی و مذہبی ہم آہنگی ہم خننگک، ارٹ میکو دا کہ ساڑی آ دور اٹی اسہ پوسکنو ایشیائی ریجن اس اڈ ہلنگ ئِ و دا لحاظ اٹ دا ملک آتیٹی سیاسی ہم آہنگی ودی مریک۔ مشتاق مہر پارے کہ اونا ذاتی مشاہدہ ٹی ہم داہیت بسنے کہ دنیا ٹی اخس کہ اکنامک، کلچرل ، و ریجنل آرگنائز یشن وجود اٹی بسونو اوفتا بنداوی سوب سیاسی ہم آہنگی ہی ئس ہرانا بدولت اوفک شون ہلکونو۔ داوخت آ ساڑی جہانی معاملہ غاتا چاہندار ڈاکٹر منظور خان آفریدی پارے کہ وزیراعظم محمد نواز شریف ہمیشہ آن نیامی ایشیائی ملک آتون تعلقداری تے مون آ دننگ نا کوشست کرینے انتئے کہ دا ملک آک نن تون مذہبی و دودوربیدہ ہی ہم آہنگی تخنگ تون اوار اوارتوانائی و قدرتی وسیلہ غاتیان مالامال ئِ ہرافتے آن نن پبی استفادہ کننگ کینہ۔
