اسلام آباد۔ 14اکتوبر (اے پی پی) پبلک اکاﺅنٹس کمیٹی نا زیلی کمیٹی بنجائی دارالحکومت اٹی 610 کشاری فارمز آتے متعینہ مقصد آتے کن کاریم اٹ ہتپننگ و دا بابت سپریم کورٹ نا احکامات آتیا عملدرآمد مفننگ آ سخت برہمی نا درشانی ئِ کرسا پورو سرجم احوال آتے بٹنگانے و سی ڈی اے ئِ پارت کننگانے کہ سپریم کورٹ نا فیصلہ آ عملدرآمدکننگے، اسہ ہم ادارہ یا شخصیت اس کانود آن بالاتر اف اگہ کانود نا خلاف ورزی کروک آتا برخلاف کارروائی متو تو معاملہ ئِ نیب انا حوالہ کننگک۔ دیوان جمعہ آ پارلیمنٹ ہاﺅس اٹی زیلی کمیٹی نا کنوینر شاہدہ اختر علی نا کماشی ٹی مس۔ دیوان اٹی بنجائی شونداری ادارہ سی ڈی اے نا 2009-10ءنا آڈٹ اعتراضات آتا جاچ ئِ ہلنگا۔ آڈٹ کمامدارآک کمیٹی ئِ پاریر کہ سی ڈی اے سول ایوی ایشن اتھارٹی آن این او سی ہلنگ آن بیدس 47منزلہ گرینڈ حیات ہوٹل نا جوڑ جاڑ نا ڈٹ انا موکل تس۔ اوٹی ایئر فیلڈ انا کانود ئِ مون آ تخنگ آن بیدس 710فٹ بڑز ماڑی نا جوڑ جاڑ کننگا۔ پی اے سی اوڑآ برہمی نا درشانی ئِ کرے و پارے کہ اوننگے کہ اوٹی دیر دیر شریک ئُ۔ اسلام آباد نا میئر شیخ انصر عزیز پارے کہ ایف آئی اے و ایلو ادارہ غاک دا معاملہ نا جاست وپاست ئِ کننگ ئُ۔ پی اے سی سفارش کرے کہ دا معاملہ نا ایف آئی آر ئِ درج کرفنگے تانکہ ڈیوالائی نا مرتکب زمہ وار آتا برخلاف فوجداری کانود نا رداٹ کارروائی ئِ عمل اٹ اتنگے۔ پی اے سی پارت کرے کہ دا معاملہ نا اسہ ہفتہ اسے ٹی جاست و پاست ئِ کرسا پی اے سی ئِ رپورٹ پیش کننگے۔ آڈٹ کمامدارآک پی اے سی ئِ پاریر کہ سی ڈی اے سرائے خربوزہ ٹی 4لکھ فی کنال آن بیدس 7لکھ روپئی فی کنال مارکیٹ نرخ انا برعکس ڈغار دوئی کرے۔ ہراڑآن ادارہ ئِ 2677ملین روپئی نا نسخان مس ۔ پی اے سی داوڑنا غٹ آڈٹ اعتراضات آتے یکجا کرسا سی ڈی اے آن رپورٹ ئِ بٹنگسا زمہ وار آتا اسہ ہفتہ اسے ٹی تعین ئِ کننگ نا پارت کرے۔ آڈٹ کمامدارآک پی اے سی ئِ پاریر کہ سی ڈی اے نا کل 610کشاری فارمز ئُ ہرافتے آن 109ڈویلپ ہی متنو۔ 339فارمز کشاری مقصد آتے کن کاریم اٹ ہتپننگ انگ ئُ ۔ 211لاٹیک زیات رقبہ غا کوزہ کرینو و جوڑجاڑی کوٹہ ئِ مون آ تختنو، سی ڈی اے کمامدارآک پاریر کہ نن 8پلاٹ منسوخ کریر و گڑاسے آ جرمانہ ہم کرین۔ اوپارے کہ دا 33سالہ لیز آ تننگانو۔ عبدالمنان پارے کہ گڑاس خلقت آک دا کشاری فارمز آتیا محل جوڑ جاڑ کرینو۔ پی اے سی پارت کرے کہ ہراخلقت آک کشاری فارمزآتیا محل جوڑ جاڑ کریر اوفتا رپورٹ ئِ تننگے و ہراتفسہ اوفتا برخلاف کارروائی کننگے۔ اگہ دُن متو تو دا کیس نیب انا حوالہ کننگک۔ آڈٹ کمامدارآک پاریر کہ سپریم کورٹ ہم حکم تسوسس کہ ہرا بندغ آک دا فارمز آتے غلط مقصد آتے کن کاریم اٹ اتنگ ئُ اوفتے خورک کرفنگے۔ سی ڈی اے پارے کہ خلقت آک عدالت آتیان حکم امتناعی دوئی کرینو میاں عبدالمنان پارے کہ ہراہم ادارہ یا شخصیت کانود نا برعکس کاریم کیک اونا برخلاف بایدے کارروائی مرے۔ کمیٹی نا کنوینر شاہدہ اختر علی پارتکرے کہ ہرا بندغ آک سپریم کورٹ آ ہنار و غٹ 610فارم آتا پورو سرجم آتے پی اے سی ئِ پیش کننگے و دارداٹ سپریم کورٹ نا فیصلہ نا پورو شرف ئِ باوری جوڑ کننگے۔
