بنجائی وزیر نا جاپان نا دورہ نا وخت آ ورلڈ مارکیٹنگ سمٹ اٹی شرکت، ایشین پروڈکٹیویٹی آرگنائزیشن نا سیکرٹری جنرل و جاپان بینک فار انٹرنیشنل کارپوریشن نا گورنر تون اوڑدہی
اسلام آباد۔ 13اکتوبر (اے پی پی) بنجائی وزیر ڈٹ بندی و شون احسن اقبال جاپان نا اِرادے ئی دورہ ئِ کرے ہراڑے او ورلڈ مارکیٹنگ سمٹ اٹی شرکت آ ن بیدس ایشین پرڈکٹیویٹی آرگنائزیشن نا سیکرٹری جنرل تون ہم اوڑدہی کرے۔ اوجاپان بینک فارانٹرنیشنل کارپوریشن نا گورنر تون ہم اوڑدہی کرے۔ دادورہ ٹی اوجاپان پاکستان پارلیمنٹری فرینڈ شپ لیگ انا چیئرمین تون ہم اوڑدہی کرے و جاپان نا ہفتہ وار انگریزی جریدہ ئِ ہم انٹرویو تس۔ داوخت آاحسن اقبال پارے کہ تدینگوک آ مسہ سال اٹی پاکستان نا اقتصادی ٹک آک گچین مسنو۔ زرمبادلہ نا کوڑی دوگنا مسنے وخت اس کہ کبینی نا کچ کم مسنے۔ مورگن سٹینلے پاکستان ئِ مون آ بروک معیشت گوندانے۔ پاکستان اسٹاک ایکسچینج اٹی ایشیا نا مسہ بھلو اسٹاک ایکسچینج آتیٹی اوارے۔ چین پاکستان اقتصادی راہداری آ ہیت کرسا بنجائی وزیر پارے کہ دا راہداری آن مسہ ارب خلقت آتے رابطہ ٹی کمک ملک۔ اوپارے کہ سی پیک آن صرف اَرا ملک آتے فائدہ مفک بلکن یورپی یونین، مڈل ایسٹ ، امریکہ و ایشیا ہم اوڑآن فائدہ ہرفنگ کیرہ۔ بنجائی وزیر جاپان ئِ ٹرانسپورٹ و توانائی نا بشخ آتیٹی کمکاری نا سلہ ہم تس۔ اوپارے کہ آپریشن ضرب عضب آن گڈ پاکستان اٹی سیکورٹی نا حالیت آک گچین مسنو۔ ایل او سی نا بابت اسہ سوج اسے نا ورندی ٹی اوپارے کہ وزیراعظم محمد نواز شریف ہمسایہ ملک آتون پرامن تعلقداری تا خواہندار ئِ۔ مقبوضہ کشمیر آ ہیت کرسا اوپارے کہ بھارتی فوج انا کنڈآن کروک آ بیدادی کارروائی تیان ہزار آ کشمیریک شہید و ٹھپی مسنو۔
