اسلام آباد۔ 13اکتوبر (اے پی پی) پنی جاچکار جاوید نور پارینے کہ پاکستان پائیدار شون نا کنڈا روان ئِ و ملکی معیشت ٹیک آف نا مرحلہ غا سرمسنے۔ ریڈیو پاکستان نا پروگرام اٹی ہیت وگپ کرسا اوپارے کہ مسہ سال مست ہراتم پاکستان مسلم لیگ (ن) نا حکومت برسراقتدار بس تو ملک دہشت گردی، توانائی تنکی و کبینی ٹی تموک ئس ملکی معیشت زوال پذیر ئس واہم ساڑی آ حکومت نا مثبت پالیسی و آپریشن ضرب عضب نا سوب ملکی معیشت اٹی دے پہ دے جوانی خننگ انگ ئِ۔ درملکی زرکارآک پاکستان نا پلو ئِ ہلنگ ئُ۔ پاکستان نا مون آ بروک آ معیشت نا دنیا ستائِ کننگ ئِ۔ اوپارے کہ پائیدار شون ئِ ہرسا بنجائی وزیر خزانہ اسحاق ڈار ئِ ایوارڈ تننگا ہرادے او وزیراعظم محمد نواز شریف تون منسوب کرینے۔ جاوید نور پارینے کہ آپریشن ضرب عضب نا سوب قطبی وزیرستان تون اوار ملک انا گیشتر علاقہ غاتیٹی امن خننگ انگ ئِ، کراچی ٹی تدوک آ عئید انا وخت آ اولیکو وار خلقت آتا بھلو کچ اس اُراتیان پیش تما و ریکارڈ خریداری کریر۔ اوپارے کہ امن و ایمنی نا حالیت ئِ ہرسا پیشن نا زرکارآک پاکستان نا پلو ئِ ہلنگ ئُ۔ کراچی ٹی اطالوی خلقت آک تینا واپاری مرکزآتے ملنگ نا پڑو ئِ کرینو و اوفتا 80 باسکی واپاری ڈل ہم زوت پاکستان آ بننگ اٹی ئِ اوپارے کہ لاہور کراچی و اسلام آباد اسٹاک ایکسچینج ئِ یکجا کننگ آن انڈیکس اٹی کیہی گناودکی ریکارڈ کننگ انگ ئِ۔ ساڑی آ حکومت نا کنڈآن ونڈ، سولر ، کول و ہائیڈل پاور پروجیکٹس آتا اجراءکننگانے ہرانا سوب ملک آن لوڈشیڈنگ نا خاتمہ مننگ ئِ و وزیراعظم پاکستان تینٹ دا پروجیکٹس آتا چاری گری ئِ کننگ ئِ و ساڑی آ حکومت نا اولین اولیت ئِ کہ 2018ءاسکان لوڈشیڈنگ نا پورو خاتمہ ئِ کننگک۔
