کوئٹہ۔ 13اکتوبر (اے پی پی) کوئٹہ تون اوار مچ آ بلوچستان اٹی یوم عاشورہ شان و شرف اٹ اڈتننگا ۔ کوئٹہ ٹی دہ می محرم الحرام نا شبیہ ذوالجناح ، تعزی و علم آتا ماتنی جلوس امام بارگاہ ، مومن آباد، علمدار روڈ آن دوئی مس ہرا تینا روایتی کسر علمدار روڈ ، قائد آباداسٹریٹ، طوغی روڈ، مشن روڈ، باچاخان چوک، لیاقت بازار ، پرنس روڈ، میکانگی روڈ آن مرسا علمدار روڈ امام بارگاہ مومن آباد آ ایسر مس۔ داوخت آ پولیس ، فرنٹیئر کور بلوچستان و لیویز نا کارندہ غاک کوئٹہ شار انا کیہی علاقہ غاتیٹی گدرینگوک آ جلوس آتا روٹس آتیان بروک و ہنوک غٹ کسرتے بند کریر وخت اس کہ جلوس آتا فضائی چاروکی ہم کننگا۔ جلوس آتا ایسری آ امام بارگاہ تیٹی مجالس عزا اڈتننگا ہراٹی عالم دین، و ذاکرین آک حضرت امام حسین ؓ و اونا سنگت آتا عظیم قربانی تا ذکر ئِ کرسا عاشورہ محرم ننے واقعہ کربلا نا یات ترفسا دا سبخ ایتک کہ ننے غٹ قومی ، لسانی، مسلکی و فروعی اختلافات آتے گیرام کرسا اتحاد و اخوت و یکجہتی نا درشانی ئِ کروئی مریک۔
