اقوام متحدہ۔ 10اکتوبر (اے پی پی) اقوام متحدہ ٹی پاکستان نا آخبتی مندوب ڈاکٹر ملیحہ لودھی پارینے کہ دیرینہ تنازعات، درملکی کوزہ و حق خودارادیت آن انکارکون آ معاملہ غاتے اقوام متحدہ نا دہشت گردی نا چٹفنگ نا حکمت عملی ٹی اوار کروئی مرے۔ اوداہیت ئِ جنرل اسمبلی نا شش می کمیٹی آن تران کرسا پارے، دا کمیٹی دہشت گردی نا برخلاف کنونشن آ کاریم کننگ اٹی ئِ۔ ڈاکٹر ملیحہ لودھی پارے کہ مجوزہ مسودہ ٹی دہشت گردی و خلقت آتا حق خودارادیت و بیرونی کوزہ غاتا برخلاف جہد اٹی واضح پرخ تخوئی مرے۔ اوپارے کہ کشمیر و فلسطین اٹی کودک شاری تا لس خون جاری ئِ، بین الاقوامی برادری نا داہیت آاتفاق ئِ کہ انسانی حق انا پامالی تا سوب انتہاپسندی ٹی ودکی مننگ ئِ ، تینا حق خودارادیت و بیرونی کوزہ نا برخلاف جہد کروک آ بندغ آتا برخلاف ریاستی واک انا کاریم اٹ اتنگ دہشت گردی اسے، دہشت گردی نا برخلاف پاکستانی عزم انا اعادہ ئِ کرسا اوپارے کہ پاکستان دہشت گردی نا گواچی ئِ و دہشت گردی نا سوب آن داوخت اسکان 60ہزار آن زیات پاکستانی شاری و سیکورٹی کارندہ تپاخت کرینو۔ اوپارے کہ دہشت گردی نا چٹفنگ کن پاکستان آپریشن ضرب عضب نا بنائِ کرینے، 2لکھ آن زیات فوج دہشت گردی نا برخلاف آپریشن اٹی کلیدی سرسہبی دوئی کرینو، ہدف نا دوئی مننگ اسکان دا آپریشن برجاسلک۔ داکان بیدس دہشت گردی نا چٹفنگ کن سریس وختی بنداو تیا گام گیج آتارداٹ نیشنل ایکشن پلان آ ہم عمل کننگ انگ ئِ ، داڑتون اوار اوار کانود نا حکمرانی ئِ باوری جوڑ کننگ و راجی و اقتصادی شون اکن گام گیج کننگ انگ ئِ ہراٹی نیاڑی و ورناتیا توجوہ تخنگ انگ ئِ۔
