پانامہ پیپرز نا بابت عمران خان دروغ نا بنداو آ پورو کسہ اس تیار کرینے
اسلام آباد۔ 10اکتوبر (اے پی پی) مسلم لیگ (ن) نا کسرشون دانیا عزیز پارینے کہ پاناما پیپرز نا بابت عمران خان دروغ نا بنداو آ پورو کسہ اس تیارکرینے، عمران خان یوٹرن ہلنگ نا ماہر ئِ، او صرف وزیراعظم جوڑ مننگ خواہک ولے پد انا درگہ غان او وزیراعظم جوڑ مننگ کپک۔ دوشنبے آ الیکشن کمیشن نا پیشن صحافی تتون ہیت وگپ کرسا دانیال عزیز پارے کہ عمران خان خلقت آتے پوسکنا پاکستان نا جھانسہ تس ، 35پنکچرز نا ہیت آک دروغ مسر، خیبر پختونخوا ٹی احتساب نا کانود ئِ بدل کننگا ہرانا سوب خلقت آک استیفہ تسر۔ عمران خان پائے خیبر پختونخواٹی نیب انت اکن آجو اف؟ او پاناما پیپرز نا بابت پارے کہ آئی سی آئی جے تینا ویب سائٹ آن وزیراعظم نا پن ئِ اسہ پلو کرے و دابابت آن وضاحت ہم پیش کرے ، عمران خان دروغ نا بنداو آ پورو کسہ اس تیار کرے۔ دانیال عزیز پارے کہ پی ٹی آئی تہہ نا وڑاٹ پِننگ نا گواچی ئِ ، تحریک انصاف اٹی عمران خان نا ذاتی پسند ناپسند چلینگک، عمران خان تینا جماعت ئِ تباہ و برباد کرے، عمران خان دروغ تڑنگ نا انتہائِ کرینے، او پدریسہ دروغ نا سیبوئِ ہلنگ ئِ و اوڑآن چست کروک آ سوج آتا ورندی ئِ تفننگ ئِ، او ادارہ غاتا لعن طعن ئِ ہلے، درحقیقت او تینٹ ادارہ غاتون مون تفننگ ئِ۔ دانیال عزیز عمران خان ئِ قلابازی گوندسا پارے کہ اسلام آباد اٹی 30اکتوبر آ مروک آ ڈرامہ محض ڈھکوسلا ئِ اودے بے نقاب کینہ۔
