اسلام آباد۔ 10اکتوبر (اے پی پی) وزیراعظم محمد نوازشریف کشمیر کاز انا پبی مخ تفی نا عزم انا اعادہ ئِ کرسا پارے کہ کشمیری تا روا آجوئی جہد ئِ دہشت گردی تون گنڈنگ بھارت نا افسوزناک غلطی اسے، دنیا نا ہچ ئُ واک اس ننے کشمیری تا آجوئی جہد نا مخ تفی آن توننگ کپک، ساڑی آ حکومت نا ایجنڈہ شون و شونہالی ئِ ، گڑاس بندغ ملک انا شون نا عمل ئِ پٹڑی آن شیف دڑفنگ خوارہ واو محض برانز نا سیاست آ باور کیرہ و منفی سیاست نا کمک اٹ پاکستان ئِ مفلوج کننگ خوارہ، او 2014ءآنبار داوار ہم بھاز بے وڑ بے سہب مریرہ۔ اوداہیت ئِ دوشنبے آ داڑے پاکستان مسلم لیگ (ن) نا بنجائی مجلس عاملہ نا دیوان ناکماشی ئِ کرسا پارے۔ وزیراعظم پارے کہ او کشمیر کاز اکن پرعزم ئِ ، پاکستان کشمیر کاز نا مخ تفی ئِ کرسا کیک۔ وزیراعظم پارے کہ برہان الدین وانی ہرادے بھارتی سیکورٹی فورسز آک شہید کریسر، اسہ حریت پسند اس ئس و و ہچ گہس اوڑآن دافخر ئِ پُلنگ کپک۔ اوپارے کہ 2013ءٹی ہراتم نن اقتدارئِ سنبھالان تو کیہی چیلنج آک مون تروک ئسر ، نن است جم وڑاٹ داچیلنج آتون مون ئِ توننگ اُن، ، دہشت گردی نا سرجز آک نمان وڑاٹ شیف بسنو ، معیشت سوگو مسنے۔ وزیراعظم ملک اٹی توانائی تنکی نا ذکر ئِ کرسا پارے کہ نن توانائی نا چیلنج آتا مون ئِ توننگ کن دے ونن کاریم کننگ اُن و توانائی نا کاختی ئِ مر کننگ کن کوشست کننگ اٹی اُن، 2018ءاسکان 10ہزار میگاواٹ آن زیات بجلی نیشنل گریڈ اٹی اوار کننگک و 2018ءاسکان لوڈشیڈنگ نا خاتمہ مریک، نن بھاشا ڈیم نا ڈغار نا دوئی کن 100 ارب روپئی تسونن و داسا ڈغار دوئی کننگانے۔ وزیراعظم پارے کہ کراچی آپریشن غٹ کڑدہ غاتا صلابت آن بناءکرے ہرانا مثبت نتیجہ غاک دوئی مننگ ئُ۔ اوپارے کہ نن تھر انا شون اکن ہم کاریم کننگ اُن و داعلاقہ ٹی کانڑ کنی نا بناءمسنے وخت اس کہ تھر اٹی کولا آن چلینگوک آ بجلی اُراہم نصب کننگ انگ ئِ داوڑمسکوہی 70سال اٹی ہم متنے۔ وزیراعظم پارے کہ بین الاقوامی منڈی ٹی کشاری مصنوعات آتا کمتی نا بناءآ نن تینا کشارگر آتا تلافی ئِ کینہ، بلوچستان اٹی سولر ٹیوب ویل آتا تنصیب کن سبسڈی فراوان کینہ۔ اوپارے کہ 46ارب ڈالر خڑچ انا پاک چین اقتصادی راہداری ڈٹ انا رداٹ ملک اٹی بنداوی ڈھانچہ نا شون نا ڈٹ آک جاری ئُ، داڑآن غٹ آن زیات فائدہ بلوچستان ئِ مریک۔ ملک اٹی اسہ ہزار ارب روپئی نا خڑچ آن موٹرویز/شاہرات جوڑ جاڑ کننگ انگ ئِ ۔ نن راجی بشخ انا شون آ ہم کاریم کننگ اُن، بروک آ 18تواٹی پین کیہی ہسپتال جوڑ جاڑ کننگک۔ وزیراعظم پارے کہ ننا ایجنڈہ شون و شونہالی ئِ ، گڑاس بندغ شون نا عمل ئِ پٹڑی آں شیف دڑفنگ خوارہ او محض برانز نا سیاست آ باور کیرہ۔ وزیراعظم پارے کہ جمہوریت برانز نا حق ایتک ولے اونا دنگ و قیود اس مریک، او منفی سیاست نا کمک اٹ پاکستان ئِ مفلوج کننگ خوارہ۔ 2014ءٹی او تینا کوشست آتے ٹی بے سہب مسر و اوداوار ہم بھاز بے وڑ بے سہب مریرہ۔
