اسلام آباد۔ 05اکتوبر (اے پی پی) وزیراعظم محمدنواز شریف پاکستان و بیلا روس نا نیام اٹ کاروباری و واپاری وارخواہی تیان پبی استفادہ نا گرج آ زورشاغسا داہیت ئِ تالان کرینے کہ بروک آ چار سال اٹی ہڑتوم آ کنڈآتا واپاری کچ ئِ 50ملین ڈالر آن سہ ارب ڈالر اسکان ودفنگ کن کوشست آتے کاریم اٹ اتنگے۔ اوداہیت ئِ بیلاروس انا صدر الیگزینڈر لوکاشنکو تون چارشنبے آ وزیراعظم ہاﺅس اٹی ون ٹو ون اوڑدہی ٹی پارے۔ وزیراعظم پارے کہ ننے ٹیکسٹائل ، کشاری سازوسامان و مصنوعات ، بھلو مشینری ، ادویہ سازی و گاڈی تا بشخ آتیٹی اسیجائی ڈٹ و کاروباری کہول آ رابطہ غاتا است بڈی ئِ کننگ نا گرج ئِ۔ وزیراعظم داہیت آ زورشاغا کہ پاکستان اٹی سیکورٹی نا حالیت آتیٹی نمان گچینی بسنے ہراڑآن زیات اقتصادی و زرکاری وارخواہی نا کسر ہموار مننگ ئِ۔ بیلاروس نا صدر نا خیر مقدم ئِ کرسا اودادورہ ئِ ودوک آ سنگتی و ہڑتوم آ کنڈآتا رابطہ غاتا غمازگوندا۔ اوپارے کہ کنے بھاز خوشی مس کہ ننا ہڑتوم آ کنڈآتا تعلقداریک کیہی بشخ آتیٹی تالان مننگ ئُ ، ننے دا تسلسل ئِ برقرار تخنگ نا گرج ئِ۔ وزیراعظم بیلاروس نا صدر ئِ تدوک آ تو بیلاروس اٹی پارلیمانی گچین کاری تا سرسہب اڈتننگ آ مبارکبادی تس۔ اوپارے کہ پاکستان و بیلاروس تدینگوک آ 16تو انا وخت 50معاہدہ و مفاہمت نا دستاویزات آتیا دستخط کرینے۔ اواومیت ظاہر کرے کہ ہڑتوم آ کنڈآک دادورہ نا وخت پین معاہدہ غاتیا دستخط کیرہ۔ وزیراعظم ایم او یوز و معاہدہ غاتیا ترندی اٹ عملدرآمد آ زورشاغا۔ صدر لوکاشنکو اونا و ڈل انا جم و جوش اٹ خیرمقدم کننگ ومہما ن نوازی آ نواز شریف نا منت واری ئِ اداکرے۔ اوپاکستان نا معیشت نا کیہی بشخ آتیٹی شون نا ستائِ کرسا وزیراعظم نواز شریف ئِ اقتصادی بحالی و دہشت گردی نا برخلاف جنگ اٹی سرسہبی تیا مبارکبادی تس۔ الیگزینڈر لوکاشنکو پارے کہ بیلاروس کیہی بشخ آتیٹی پاکستان تون کمکاری ئِ ودفنگ نا خواہندار ئِ۔ اوداہیت آ زورشاغا کہ پاکستان و بیلاروس ئِ الس نا مفاد اٹی خننگوک آ وارخواہی تیان پبی استفادہ کننگ نا گرج ئِ۔
