الیگزینڈر لوکاشنکو نا کنڈآن نیو کلیئر سپلائر رڑآ پاکستان نا موقف نا مخ تفی
اسلام آباد۔ 05اکتوبر (اے پی پی) وزیراعظم محمد نواز شریف پارینے کہ پاکستان و بیلا روس واپار، کاروبارو زرکاری نا مون آ دننگ کن ٹھوس بنداواستوار کننگ ئِ،اوڑآن کثیر الجہتی ہڑتوم آ کنڈآتا واپار ئِ ودفنگ کن سوگوبنداو فراوان مریک، ہڑتوم آ ملک آتا نیام اٹ وسیع تر بڑزکو کہول انا درشان تا تسلسل ئِ برقرار تخنگ نا گرج ئِ ، ہمسایہ غاتون گچین تعلقداری استوار کننگ نا پالیسی نا پیروی ئِ کننگ ئِ، بھارت مقبوضہ کشمیر اٹی سنگین حالیت آتیان جہانی برادری نا توجوہ ئِ اسہ پلو کننگ کن دانستہ وڑاٹ لین آف کنٹرول آ بے چیٹی ٹی ودکی کرے۔ اوداہیت ئِ چارشنبے آداڑے وزیراعظم ہاﺅس اٹی بیلاروس نا صدر الیگزینڈر لوکاشنکو تون ڈل انا کہول آ مذاکرات نا وخت آ پارے۔ بیلاروس انا صدر پاکستان نا 3دے ئی سرکاری دورہ غاٹی ئِ۔ ڈل انا خیرمقدم ئِ کرسا وزیراعظم پارے کہ پاکستان بیلاروس تون تینا تعلقداری تے بھاز اہمیت ایتک وہڑتوم آ ملک آتانیام اٹ پرجوش، خوشگوار و کثیر الجہتی رابطہ غاک استوار ئُ۔ اوپارے کہ پاکستان بیلاروس تون معیشت، واپار، زرکاری، صنعت، تعلیم، دفاع، کشت و کشار، دودوربیدہ تون اوار غٹ بشخ آتیٹی تعلقداری نا مون آ دننگ نا خواہندار ئِ۔ اوپارے کہ پاکستان اینو غٹ آن زیات زرکار دوست ملک آتیان اسٹ ئِ ہرا شون و شان زرکاری وارخواہی و تقریباََ 20کروڑ خلقت نا بھلا مارکیٹ پیش کننگ ئِ۔ وزیراعظم پارے کہ ہڑتوم آ ملک آتا واپاری تعلقداری تیٹی اڑاند آتا پیدواری و ویل آتا ایسری کن اسیجائی واپاری کمیٹی نا اڈتننگ اسہ اہم ئُ ذریعہ اسے۔ بیلاروس نا صدر ئِ پارے کہ اونا حکومت معیشت نا بحالی و توانائی نا کاختی نا مون ئِ توننگ آ توجوہ تخانے، نن گچین اسلوب حکمرانی ، انسداد بدعنوانی، مالیاتی نظم و ضبط ئِ باوری جوڑ کننگ و معیشت نا بحالی کن ٹیکس بنداو ئِ اونا حقیقی لائخی نا رداٹ وسعت تننگ کن پرعزم ئِ۔ اوپارے کہ ہڑتوم آ ملک آتا نیام اٹ وسیع تر بڑزکو کہول نا درشان تا تسلسل ئِ برقرار تخنگ نا گرج ئِ۔ بیلاروس نا صدر پارے کہ اونا ملک آٹو انجینئرنگ ، کشاری دسنگ نا مشینری ، روڈآتا جوڑ جاڑ نا مشینری و ڈمپ ٹرک آتون اوار بھلا مشینری تا تیاری ٹی بھاز مہارت تخک۔ ہڑتوم آ ملک آک دابشخ آتیٹی اسیجائی ڈٹ و کاروباری رابطہ غاتے مون آ دننگ کیرہ۔ صدر لوکاشنکو پارے کہ بیلاروس و پاکستان ئِ خشک پال انا پیداوار نا تیاری، ایلو ڈیری مصنوعات ٹیکسٹائل، آٹوپارٹس، ازباب جراحی، ادویہ سازی و تین پہ تینی وڑاٹ مفید ایلو بشخ آتون اوار وسیع تر کشاری مصنوعات آتا تیاری و پروسیسنگ کن اسیجائی ڈٹ شروع کننگ نا گمان آتا جاچ ئِ ہلوئی مرے۔ وزیراعظم پارے کہ بھارت مقبوضہ کشمیر اٹی سنگین حالیت آتیان جہانی برادری نا توجوہ ئِ اسہ پلوکننگ کن دانستہ وڑاٹ لین آف کنٹرول آ بے چیٹی ٹی ودکی کرے۔ وزیراعظم اوفتے پارے کہ مقبوضہ کشمیر اٹی 110بے گناہ بندغ شہید و 12ہزار آن زیات ٹھپی وخت اس کہ سد آتا بینائی بے وڑ زہمی مسنے و 150 آن زیات بندغ آخبتی وڑاٹ بینائی آن محروم مسنو۔ داکان گڈ وزیراعظم بیلاروس نا صدر و اونا ڈل انا اعزاز اٹی دے انا اِرغ ئِ ہم تس۔
