اسلام آباد۔ 05اکتوبر (اے پی پی) صدر مملکت ممنون حسین پارینے کہ حکومت نا کشارگر آتا ویل آتے اولیتی بنداو آ ایسر کننگ ئِ ، پاکستان موسمیاتی تبدیلی تتون مون تننگ کن گام گیج کننگ ئِ و دارداٹ جہانی ادارہ برائے خور و کشت و کشار نا کمکاری المی ئِ۔ صدر مملکت داہیت ئِ چارشنبے آ فوڈ اینڈ ایگریکلچر تنظیم(ایف اے او) نا ڈائریکٹر جنرل جوز گراز نیوڈی سلواتون اوڑدہی نا وخت آ پارے۔ داوخت آ بنجائی وزیر خور سکندرحیات بوسن آن بیدس ایلو بڑزکو کمامدار آک ہم ساڑی ئسر۔ صدر مملکت پارے کہ ایف اے او نیزگاری نا چٹفنگ، غذائی رکھ، ذریعہ معاش خور و خلقی شون نا بشخ آتیٹی اہم گام گیج کننگ ئِ۔ اوپارے کہ تنظیم آفت زدہ علاقہ غاتیٹی عارضی بے اُرا بندغ آتا بحالی ، سہدار و اوفتے آن لگوک آ ناجوڑی تیان بچنگ کن تینا پبی کڑد ئِ ادا کرسا کرینے۔ صدر دااومیت نا درشانی ئِ کرے کہ او دا مشن ئِ مون آ ہم دیک۔ صدر مملکت پارے کہ پاکستان کشاری غلہ غاتا کیہی بشخ آتیٹی خودکفالت دوئی کرینے و فوڈ اینڈ ایگریکلچر تنظیم نا کمکاری نا سوب بھاز انگا کشاری غلہ درآمد کننگ ئِ۔ صدر مملکت پارے کہ حکومت پاکستان ماحولیاتی تبدیلی تا پیش نظر کشت وکشار نا شون و چنکا بزغر تا معاشی حالیت ئِ گچین جوڑ کننگ نا گام گیج کننگ ئِ ہراٹی ننے فوڈ اینڈ ایگریکلچرتنظیم آتون اوار ایلو جہانی ادارہ غاتا کمک درکارمریک۔ صدر مملکت پارے کہ پاکستان اٹی زرکاری نا گچین وارخواہی ساڑی ارے ہراڑآن بین الاقوامی زرکار آتے پبی فائدہ ہرفوئی مرے۔ ڈائریکٹر جنرل ایف اے او جوزگراز نیوڈی سلواپارے کہ پاکستان نا کشاری غلہ ودی کننگ و برآمد اٹی بھاز اہم ئُ کڑد اسے۔ ڈائریکٹر جنرل تنظیمی سرجزآتا بارواٹی صدر مملکت ئِ معلومدار کرے۔
