اسلام آباد۔ 04اکتوبر (اے پی پی) جموں و کشمیر نا بارواٹی وزیراعظم نا خصوصی نمائندگان سینیٹر مشاہد حسین سید و قومی اسمبلی نا باسک ڈاکٹر شذرا منصب پارینے کہ دے ٹکی تیمور آنبار کشمیر نا اسل ئِ ہم اوفتا ناقابل تنسیخ حق خودارادیت تننگے، جموں و کشمیر نا الس تینا جائز حق خودارادیت ئِ پدریسہ توننگ نا برخلاف برانز نا تیناجمہوری حق ئِ کاریم اٹ اتنگ ئُ ہرانا وعدہ کیہی قرارداد آتیٹی اقوام متحدہ سلامتی کونسل کرینے۔ اوداخیال آتا درشانی ئِ اوغانستان و پاکستان نا بارواٹی امریکی خصوصی نمائندہ سفیر رچرڈ اولسن و امریکی محکمہ خارجہ ٹی ایلو سینئر کمامدارآتون واشنگٹن اٹی تینا اوڑدہی ٹی کریر۔ امریکہ ٹی پاکستان نا سفیر جلیل عباس جیلانی ہم اوفتے تون اوار ئس۔ دفترخارجہ نا کنڈآن جاری بیان نارداٹ خصوصی نمائندگانک امریکی عہدیدار آتے پاریر کہ مقبوضہ کشمیر اٹی جاری الس نا تحریک ہندی و ازخود ئِ ہرادے ورناکشمیری حریت پسند برہان وانی نا ماورائے عدالت شہید ی آن گڈ پین سوگوی ملانے۔ مشاہدحسین سید و شذرا منصب اودے مقبوضہ کشمیر ، ہرا کرہ ارض آ غٹ آن زیات کچ اٹی فوجی تعیناتی نا علاقہ ئِ ، ٹی بے گناہ و کودک شاری تا برخلاف بھارتی فوج اناکنڈآن انسانی حق انا منظم خلاف ورزی و وحشیانہ ظلم انا دستاویزی ثبوت آن ہم معلومدار کریر۔ داہیت ئِ ہم تالان کریر کہ ہراوڑ چرہ انگا توفک و ایلو ممنوعہ سلہہ غاتے بھارتی کمامدارآتا کنڈآن کشمیری الس نا توار ئِ توننگ کن کاریم اٹ اتنگ انگ ئِ۔ داکان بیدس کشمیری شاری تے اسہ جاگہ غا جمع مننگ، عبادت کننگ و تینا عقیدہ غا عمل کننگ تون اوار اوفتا ایلو بنداوی حق آتیان ہم محروم کننگ انگ ئِ۔ اوفک امریکی کمامدارآتے باوری ترفیر کہ دا بھارت ہی ئس ہرا جموں و کشمیر نا مقدمہ 1948ءٹی اقوام متحدہ غا دریسس۔ اوفک استدال کریر کہ جموں و کشمیرنا الس ناساڑی آ جہد تینا آخبت نا تعین کننگ کن اوفتے تون وعدہ کروک استصواب رائے نا کانودی و سفارتی حق آن محروم تخنگ نا بناءآ اوفتامایوسی نا نتیجہ ئِ۔ اقوام متحدہ سلامتی کونسل نا آخبتی باسک مننگ نا حیثیت آن امریکہ غا کانودی و اخلاقی وڑاٹ زمہ واری مریک کہ او داہیت ئِ باوری جوڑ کے کہ کشمیر نا الس ہنداجوزہ غاتا رداٹ تینا ناقابل تنسیخ حق خودارادیت استعمال کننگ نا قابل مرے دنکہ بین الاقوامی برادری دے ٹکی تیمور نا الس ئِ داحق تسوسس۔ خصوصی نمائندہ غاک بھارت نا کنڈآن سیز فائر نا خلاف ورزی تا چاروکی کن پاکستان و بھارت کن اقوام متحدہ فوجی مبصر رڑ ئِ فعال جوڑ کننگ نا گرج آہم زورشاغار۔ امریکی عہدیدارآک کشمیر اٹی بھارتی انسانی حق انا خلاف ورزی تے نوٹ کرسا پاریر کہ دننگا بیدادی تے انسانی حق انا حالیت آتابارواٹی اوفتا سالانہ جہانی رپورٹ اٹی دستاویز بندی و رپورٹ کننگ انگ ئِ ۔ امریکی عہدیدار آک مستی پاریر کہ بھارت اٹی انسانی حق انا خلاف ورزی تا بابت رپورٹ امریکی جہانی رپورٹ نا اسہ سریس ترین بشخ اس اڈ تس۔ سویلی ایشیا ٹی ودوک آ بے چیٹی نا تناظر اٹی داہیت آاتفاق خننگاکہ ڈیہہ ٹی پائیدار امن و سوگوی کن کشمیرنا تنازعہ نا زوت ایسر المی ئِ۔
