اسلام آباد۔ 04اکتوبر (اے پی پی) بنجائی وزیر واپار انجینئر خرم دستیگر خان تون بیلاروس انا بڑزکو کہول نا ڈل ڈپٹی وزیراعظم ولادی میر سیمشکو نا سروکی ٹی اوڑدہی کریر و اودے ہڑتوم آ ملک آتا نیام اٹ بیلاروس انا صدر نا پاکستان نا دورہ نا وخت واپاری معاہدہ و ایم اویوز آن معلومدار کریر۔ اوفک پاریر کہ ہڑتوم آ ملک آتا نیام اٹ بینکنگ ، کسٹم و ایوی ایشن تون اوار کیہی بشخ آتیٹی ایم او یوز آ دستخط کننگ نا گمان ارے۔ اوفک وزیر واپار ئِ پاریر کہ ہڑتوم آ ملک آتا نیام اٹ مسکوہی اِرا سال آن تین پہ تینی تعلقداری تیٹی ترندی اٹ ودکی مسنے و اوفتا ساڑی آ پاکستان نا دورہ ہڑتوم آکنڈآتا واپار و کمکاری ئِ ودفنگ نا اسہ کڑی اسے۔ انجینئر خرم دستگیر خان ڈل ئِ ببوخیرٹ پارے و دااومیت نا درشانی ئِ کرے کہ ساڑی آ دورہ ہڑتوم آ کنڈآتا واپار و زرکاری اٹی ودکی نا سوب جوڑ مریک۔ اوپارے کہ معیشت ، واپار و زرکاری تون اوار کیہی بشخ آتیٹی ہڑتوم آ کنڈآتا واپار ئِ ودفنگ نا بھلو گنجائش اس ساڑی ارے۔ اوپارے کہ ہڑتوم آ ملک آک پوریاگر و زرکارآتے معاشی سرجزآتا مون آ دننگ کن پبی کمک و آسراتی فراوان کننگ ئِ۔ اومستی پارے کہ ہڑتوم آ ملک آتا نیام اٹ ساڑی آ واپاری کچ اٹی پدریسہ ودکی نا بھلو گنجائش اس ساڑی ارے، پاکستان درملکی زرکارآتے زرکاری کن سازگار چاگڑد و گچین آسراتی فراوان کننگ ئِ و بیلاروس ئِ سی پیک اٹی زرکاری ناوارخواہی تیان فائدہ ہرفوئی مرے۔ اوپارے کہ ہڑتوم آ ملک آتا نیام اٹ واپار، زرکاری تون اوار تین پہ تینی تعلقداری تا مون آ دننگ کن داوڑنا اوڑدہی و واپاری ڈل آتا تبادلہ ئِ جاری کننگے۔
