ڈیرہ مراد جمالی۔ 04اکتوبر (اے پی پی) مسلم لیگ (ن) نا صوبائی اسمبلی باسک میر عبدالماجد ابڑو پارینے کہ صوبہ نا الس نا ویل آتیان حکومت ئِ جوانی اٹ سمائِ الس ویل آتے کم کننگ کن صوبائی حکومت دے ونن کاریم کننگ ئِ ہرانا سوب صوبہ آن پسماندگی ناخاتمہ مننگ ئِ و شون نا پوسکنا دور انا بناءمسنے۔ داخیال آتا درشانی ئِ او جتا ڈل آتون ہیت وگپ کرسا کرے۔ میر عبدالماجد ابڑو پارینے کہ نن داوا تیان بیدس عملی گام گیج آتیا باور کینہ و الیکشن اٹی الس تون کروک آ وعدہ غاتیاعمل کننگ اٹی اُن و الس نا ویل آتے ایسر کننگ کن دے و نن کاریم کننگ اُن۔ اوپارے کہ ڈیرہ مراد جمالی بھاز زیات باسن انگا علاقہ غاتیٹی حساب مریک و بجلی نا لوڈشیڈنگ نا عذاب آں کشنگ کن اوچ پاور آن بجلی نا فراوانی کن 220 کے وی گریڈ اسٹیشن نا جوڑ جاڑ نا کاریم جاری ئِ و ڈیرہ مراد جمالی نا 66کے وی گریڈ اسٹیشن ئِ اپ گریڈ کرسا 132کے وی نا پوسکنا گریڈاسٹیشن جوڑ جاڑ کننگک ہرانا باقاعدہ ٹینڈر ہم کننگانے و الس ئِ 2017ءٹی لوڈشیڈنگ نا عذاب آن نجات ترفسا اوفتے اوچ پاور آن بجلی تننگ نابنائِ کننگک ، میر عبدالماجد ابڑو پارے کہ وزیراعظم محمد نواز شریف صوبہ بلوچستان نا شون و پسماندگی نا چٹفنگ کن مخلصانہ وڑاٹ کاریم کننگ ئِ نصیر آباد نا گرین بیلٹ ئِ مون آ تخسا ننا درخواست آ کشاری کالج نا منظوری و جوڑ جاڑ کن فنڈز جتا کننگ اسہ بھاز بھلو گام اسے کشاری کالج نا جوڑ جاڑ آن نصیر آباد نا گرین بیلٹ اٹی پین شون بریک و بزغر و زمیندار آتے بھاز زیات فائدہ رسینگک و فصل و اوفتا پیداواری نا بابت مفید معلومداری ملک ہراڑآن اوفتا کٹیا ٹی ہم ودکی مریک و ورنانسل نا تربیت و روزگار نا وارخواہی ملنگ کیک۔
