اسلام آباد۔ 03اکتوبر (اے پی پی) کشمیر نا ویل آ حکومت ، فوج ، سیاسی جماعت و الس متحد ئُ، دا ویل ئِ اقوام متحدہ نا قراردادآتیا عملدرآمد کرسا ایسر کننگ مریک، کشمیری تیا بھارتی ظلم و ستم جہانی معاہدہ غاتا خلاف ورزی ئِ۔ دوشنبے آ داڑے وزیراعظم محمد نواز شریف نا کماشی ٹی سیاسی و پارلیمانی جماعت آتا کسرشون تا دیوان اٹی پاکستان نا سلہہ بند فوج انا شہید و مقبوضہ جموں و کشمیر نا شہید آتے کن فاتحہ خوانی کننگا۔ دیوان آن گڈ جاری مروک آ اسیجائی اعلامیہ ٹی دا عزم انا درشانی کننگا کہ پاکستان نا حکومت م، فوج ، سیاسی جماعت و الس کشمیری تا حق خودارادیت نا مخ تفی کن پوروی وڑاٹ متحدئُ ہرانا ضمانت اقوام متحدہ نا سلامتی کونسل نا قراردادآتیٹی تننگانے۔ بھارتی فوج مقبوضہ کشمیر اٹی تدوک آ 87دے تیٹی 110بے گناہ شاری تے شہید کریر ہرافتے ٹی چناو نیاڑیک ہم اوارو وخت اس کہ پیلٹ گن آن 700 آن زیات کشمیری تے بینائی آن محروم کریر۔ اعلامیہ ٹی پاننگانے کہ نن بے گناہ کشمیری تا پدریسہ کشت و خون نا مذمت ئِ کینہ ہرا انسانی حق و جہانی کانود نا سنگین خلاف ورزی ئِ۔ اعلامیہ ٹی بھارت نا ساڑی آ بلااشتعال جارحیت و سیز فائر نا پدریسہ خلاف ورزی تا مذمت کننگا ہرا علاقائی امن و سلامتی کن خطرہ اسے۔ بھارت ہرا بربریت و ظالمانہ کارروائی تیان کشمیری تا آجوئی نا ہندی جہد آن توجوہ ئِ اسہ پلو کننگ نا کوشست کننگ ئِ، نن اودے مسترد کینہ۔ لین آف کنٹرول نا ایپار آن دہشت گردی نا بھارت نا دروغ دوبہ غاتے ہم مسترد کینہ۔ اعلامیہ ٹی پاننگانے کہ کشمیری تا خلاف مون انگا کانود نا پدریسہ استعمال و وار وار کرفیو نا نفاذ قابل افسوز ئِ ہراڑآن مقبوضہ کشمیر نا خلقت آتا مشکلات آتیٹی ودکی مسنے۔ بھارت نا کنڈآن کشمیر ئِ اٹوٹ انگ گوندنگ نا مضحکہ خیز داوا ئِ ہم شریک مروک آک مسترد کرینو ہالانکہ بھارت تینٹ جموں و کشمیر نا ویل ئِ سیکورٹی کونسل آ ہناسس دریسس ہرا اودے اقوام متحدہ نا اِرا وت واجہ ملک آتا نیام اٹ اسہ جہانی تنازعہ گونداسس۔ اعلامیہ ٹی پاننگانے کہ نن بلوچستان اٹی بھارت نا ثابت شدہ مداخلت نا مذمت ئِ کینہ۔ پاکستان ئِ نزور کننگ نا بھارتی کوشست آتا مذمت ئِ کینہ ہرانا اعتراف دزگیر مروک ”را“ نا ایجنٹ کلبھوشن یادیو ہم کرینے ہرابھارتی بحریہ نا حاضر سروس افسر ئس۔ اعلامیہ ٹی پاننگانے کہ سارک فورم اٹی شرکت آن انکار تون اوار غٹ ہڑتوم آ کنڈآتا کثیر الجہتی مذاکرات نا غٹ سفارتی کوشست آتے بے سہب جوڑ کننگ نا بھارتی عزم قابل افسوز ئِ و پاکستان و ڈیہہ نا برخلاف دیر ئِ سلہہ نا وڑاٹ کاریم اٹ اتنگ نا بھارتی ڈٹ انا مذمت ئِ کینہ ہرا بین الاقوامی زمہ واری تا خلاف ورزی ئِ۔ بھارت نا کنڈآن سندھ طاس معاہدہ ئِ اسہ پلوی وڑاٹ منسوخ کننگ نا کوشست آتے جارحیت تکنگک۔ اعلامیہ ٹی بھارت نا کنڈآن لین آف کنٹرول نا پارسرجیکل سٹرائیک نا دروغ نا داواتے مسترد کرسا پاننگانے کہ بھارت نا دروغ نا داوا مقبوضہ کشمیر اٹی ظلم و ستم آن دنیا نا توجوہ ئِ اسہ پلو کننگ نا کوشست اسے۔ اعلامیہ ٹی پاننگانے کہ نن کشمیری الس نا حق خودارادیت نا دلیرانہ جہد و کمٹمنٹ نا ستا ئِ کینہ ہرا داسا کیہی نسل آتے منتقل مسنو۔ حق خودارادیت نا وعدہ سلامتی کونسل نا قرارداد آتیٹی جہانی برادری کریسس۔ اعلامیہ ٹی بھارتی جارحیت نا منہ توڑ ورندی ئِ تننگ نا پاکستان نا سلہہ بند فوج انا بہادرانہ و غیر متزلزل کمٹمنٹ نا ستاءکننگا و مقبوضہ کشمیر اٹی اقوام متحدہ نا ہائی کمشنر انسانی حق و او آئی سی نا مشن نا کنڈآن فیکٹ فائنڈنگ مشن گدریفنگ نا فیصلہ غاتا خیرمقدم ئِ کننگا۔ ہراوڑ دے ٹکی تیمور و سویلی سوڈان اٹی حق خودارادیت آن بابت سلامتی کونسل نا قرارداد آتیا عملدرآمد کننگا، ہنداوڑ نن بین الاقوامی برادری خاص کر بھلا واک آتیا زورشاغنہ کہ او کشمیری تا حق خودارادیت کن سلامتی کونسل نا قرارداد آتیا عملدرآمد کن ٹھوس گام گیج کے۔ اعلامیہ ٹی مقبوضہ کشمیر نا الس نا حق خودارادیت کن سیاسی، اخلاقی و سفارتی مخ تفی فراوان کننگ نا درشان کننگا۔ اعلامیہ ٹی پاننگاکہ پاکستان دہشت گردی و پرتشدد انتہاپسندی نا برخلاف بے مثال جنگ اٹی اختہ ئِ۔ نن نیشنل ایکشن پلان آ پوروی وڑاٹ عملدرآمد کننگ نا عزم انا درشانی ئِ کینہ ہراڑآ تدوک آ اے پی سی ٹی اتفاق مسوسس۔
