اسلام آباد۔ 03اکتوبر(اے پی پی) وزیراعظم محمد نواز شریف پارینے کہ کشمیری و پاکستانی تے جتا کننگ مفک، پارلیمنٹ نا غٹ سیاسی جماعت آتا مخ تفی تون ہر بین الاقوامی فورم آ کشمیری تا حالیت زار ئِ تالان کننگ کن سخت کوشست آتے کننگک۔ دوشنبے آ داڑے آل پارٹیز کانفرنس آن تران کرسا اوپارے کہ دادیوان پاکستان ئِ سوگو و کشمیر نا کاز ئِ پین سوگو جوڑ کرینے۔ نن قومی اہمیت نا معاملہ خاص کر کشمیر کاز آ یکجائُ۔ اوپارے کہ حق خودارادیت کن کشمیری تا جہد ہندی ئِ ہرانا مینڈیٹ سلامتی کونسل نا قرارداد آتیٹی تننگانے۔ وزیراعظم پارٹی کسرشون و سیاسی جماعت آتا نمائندہ غاتاہم اظہار تشکر کرے ہراک سنجیدہ آراءتسر۔ اوپارے کہ بھاز جوان سلاہ تننگا و ہراتسکان مرے کنا حکومت اوفتیا عملدرآمد نا کوشست ئِ کیک۔ داکان مست پارٹی کسرشونک تینا گونڈ ریمارکس اٹی دا اہم موڑ آ حکومت کن تینا تعلقدار جماعت آتا مخ تفی نا درشانی ئِ کرے۔ اپوزیشن لیڈر سید خورشید احمد شاہ قومی سلامتی آن بابت پارلیمانی کمیٹی نا اڈتننگ نا سلاہ تس و پارے کہ اہم قومی معاملہ غاتیا اتفاق رائے ودی کننگ نا ہمیش کوشست کیک۔ اوپارے کہ اینو نا دیوان داہیت انا مظہر ئِ کہ غٹ سیاسی جماعت آک اسہ پنہ غاٹی ئُ۔ او جنرل اسمبلی ٹی کشمیر کاز ئِ گچین وڑاٹ تالان کننگ نا وزیراعظم نا تران نا ستائِ کرے۔ قومی معاملہ غاتیان بابت خورشید شاہ پارے کہ پارٹی وابستگی آن قطع نظر نن غٹ پاکستانی اُن و تینا درملکی سفارت خانہ غاتے فعال کروئی مرے۔ اوکشمیر کاز ئِ تالان کننگ کن اسلامی ملک آتا مخ تفی آ زورشاغا۔
