اسلام آباد۔ 30ستمبر (اے پی پی) وزیراعظم محمد نواز شریف دوٹوک وڑاٹ پارینے کہ وطن نا دفاع کن قوم انا چناچنا تیار ئِ، مچ آ قوم سلہہ بند فوج اتون ہم کوپہ سلوک ئِ ، کس اسے ہم پاکستان نا گل زمین آ خراب انگا نظرشاغنگ نا موکل تفننگک، مقبوضہ جموں و کشمیر اٹی جاری اندھادھندبربریت و جارحیت ناقابل قبول ئِ۔ اوداہیت ئِ جمعہ آ بنجائی کابینہ نا دیوان نا کماشی ئِ کرسا پارے۔ وزیراعظم پارے کہ نن تینا توانائی تے الس نا شرحالی و جوڑ جاڑ و شون آ تخنگ خوانہ، نیزگاری و بے روزگاری نا چٹفنگ و السی شون و شونہالی نا مزل دوئی کننگ ننا عزم ئِ ہراڑکن نن سرگرم اُن۔ اوپارے کہ نن دا مقصد آتے کن امن خوانہ ولے ای دا ہم صفا کیو کہ وطن نا دفاع کن قوم انا چنا چنا تیار ئِ ، مچ آ قوم و سلہہ بند فوج اتون ہم کوپہ سلوک ئُ ، کس اسے پاکستان نا گل زمین آ خراب انگا نظر شاغنگ نا موکل تفننگک۔ وزیراعظم پارے کہ بھارت نا مقبوضہ جموں و کشمیر اٹی جاری بربریت و جارحیت ناقابل قبول ئِ اوپارے کہ کشمیر تقسیم ہند نا ناپورو ایجنڈہ ئِ ہرادے نظر انداز کننگ مفک۔ بھارتی فوج انا بیدادی کشمیری تا جوزہ حریت ئِ لتاڑنگ کپک۔ بنجائی کابینہ نا دیوان اٹی مقبوضہ کشمیر نا ساڑی آ حالیت آتیا غور کننگا۔ خارجہ سیکرٹری اعزاز احمد چوہدری کابینہ ئِ بریفنگ تس۔
