اسلام آباد۔ 29 ستمبر (اے پی پی) جمعیت علماءاسلام (ف) نا سروک قومی اسمبلی نا باسک مولانافضل الرحمان پارینے کہ پاکستان سویلی ایشیائِ بھس کاری آن بچفنگ کن صبر انا درشانی ئِ کننگ ئِ، اقوام متحدہ و جہانی برادری ئِ بھارت نا کنڈآن ایل او سی نا خلاف ورزی نا نوٹس ئِ ہلوئی مرے ، پاکستان نا امن نا خواہش ئِ نزوری سرپند کننگپ، بھارت مقبوضہ کشمیر آن توجوہ ئِ اسہ پلو کننگ کن ایل او سی آ سم کاری کننگ ئِ، بھارتی وزیراعظم نا مقصد ڈیہہ نا امن ئِ بھس کروئی ئِ، کشمیر نا ویل آ اسلامی ملک آتون بھاز انگا اومیت آک وابستہ ئُ۔ پنچ شنبے آ پارلیمنٹ ہاﺅس نا پیشن میڈیا تو ن ہیت وگپ کرسا اوپارے کہ مودی انتظامیہ پاکستان نا برخلاف صفا پالیسی اس تینا کرینو۔ بھارت سفارتی و دفاعی کہول آ پاکستان ئِ تنیا کننگ کن گام گیج کننگ ئِ۔ ایل او سی آبھارتی سم کاری نا شدید مذمت ئِ کینہ، دننگا گام گیج آتیان بھارت مقبوضہ کشمیر آن توجوہ ئِ اسہ پلو کننگ خواہک اونا باوجود مقبوضہ کشمیر اٹی پاکستان نا حق اٹی نعرہ خلنگ انگ ئِ۔ کشمیری پاکستان کن جان تے قربان کننگ ئُ۔ پاکستانی بیرک ئِ چست کننگ انگ ئِ۔ مولانا فضل الرحمان پارے کہ بھارت ئِ ڈیہہ نا بھلا ملک انا حیثیت آن زمہ وارانہ گام گیج چست کروئی مرے، پاکستان داوخت اسکان ہندا سوب آن سگ انا درشانی ئِ کننگ ئِ کہ او سویلی ایشیائِ خلیس آن دوچار کننگ خواپک ولے پاکستان نا امن نا خواہش ئِ نزوری سرپند کننگپ۔ جہانی برادری و اقوام متحدہ ئِ ایل او سی آ بھارتی فورسز آتا سم کاری نا سختی اٹ نوٹس ئِ ہلوئی مرے و بھارت ئِ 1949ءنا سم بندی نا معاہدہ آ عملدرآمد کن پابند کروئی مرے۔ سارک کانفرنس منسوخ مننگ نا زمہ وار پاکستان آخا بھارت ئِ۔ پاکستان نا سلہہ بند فوج لمہ وطن نا دفاع نا پورو لائخی تخک۔
