اسلام آباد۔ 29ستمبر (اے پی پی) کشمیر نا ویل ئِ تالان کننگ کن وزیراعظم پاکستان نا نمائندہ خصوصی رانا محمد افضل خان و سینیٹر عائشہ رضا فاروق فرانسیسی سینیٹرز، فرانس نا وزارت خارجہ نا بڑزکو کمامدار و ہندی تھنک ٹینکس تون اوڑدہی کریر و اوفتے مقبوضہ کشمیر اٹی انسانی حق انا سنگین خلاف ورزی تیا بریفنگ تسر۔ اوفرانس نا دارالحکومت پیرس اٹی فرانسیسی سینیٹ اٹی فرانس پاکستان فرینڈ شپ رڑانا صدر سینیٹر پاسکل ایلیز رد تون اوڑدہی کریر و اودے مقبوضہ کشمیر اٹی کودک الس آ بھارتی قابض فوج انا بیدادی آن معلومدار کریر۔ سینیٹر عائشہ رضا فاروق و رانا محمد افضل خان وزیراعظم نا کنڈآن دنیا نا اہم دارالحکومت آتیٹی کشمیر نا ویل ئِ تالان کننگ کن تخوک آ 22خصوصی نمائندہ غاتیٹی اوارو۔ وزیراعظم نا خصوصی نمائندہ غاک بھارتی قابض فوج انا کنڈآن کشمیری الس نا برخلاف واک و خاص کر پیلٹ گن آتا بے پرخ کاریم اٹ اتنگ آن بابت معلومدار کریر ہراڑآن سد آ بندغ آک بینائی آن محروم و ٹھپی مسنو ۔ اوفرانس آ زورشاغار کہ او سلامتی کونسل نا آخبتی باسک نا حیثیت آن کشمیر نا ویل انا ایسری کن اقوام متحدہ نا قرارداد آتیا عملدرآمد ئِ باوری جوڑ کننگ کن تینا کڑد ئِ ادا کے ہراٹی بھارتی مقبوضہ کشمیر ئِ اسہ متنازعہ علاقہ اس امنا کننگانے و کشمیری تا حق خودارادیت کن آجو و شفاف رائے شماری آ زور شاغنگانے۔اوفک پاریر کہ پاکستان ڈیہہ ٹی امن و سوگوی نا خواہندار ئِ و بھارت تون غٹ تنازعہ غاتا بامقصد مذاکرات نا کمک اٹ پرامن ایسری خواہک۔ وزیراعظم نا خصوصی نمائندہ غاک فرانس اٹی پاکستانی و کشمیری کمیونٹی تتون ہم اوڑدہی کریر و اوفتے جہانی فورمز خاص کر اقوام متحدہ ٹی کشمیر نا ویل ئِ تالان کننگ کن حکومت پاکستان نا کنڈآن کروک آ گام گیج آتا بارواٹی معلومدار کریر۔ داوخت آ پاکستانی و کشمیری برادری نا باسک آک فرانس اٹی کشمیر ناویل ئِ گچین و پرامن وڑاٹ تالان کننگ آ وزیراعظم نا خصوصی نمائندہ غاتا کڑد انا ستائِ کریر ۔
