اسلام آباد۔ 28 ستمبر (اے پی پی) بنجائی وزیر پارلیمانی سیکرٹری اوورسیز پاکستانیز سردار شفقت حیات بلوچ پارینے کہ 18 کمرشل اتاشی تا تعیناتی خاص میرٹ آ کننگانے۔ چارشنبے آ قومی اسمبلی ٹی وقفہ سوج آتا وخت اسہ سوج اسے نا ورندی ٹی اوپارے کہ دانا مہالو مروک آ ٹیسٹ ئِ وزیراعظم منسوخ کریسس۔ دُوارہ ٹیسٹ مننگ آ اولیکو ٹیسٹ اٹی اولیکو پوزیشن دوئی کروک آ ارٹ میکو وار ٹیسٹ ئِ پاس ہی کننگ کتو۔ اوفتے ٹی اِرٹ سندھ، اسٹ بلوچستان، 15پنجاب آن تعینات کننگانے۔ عائشہ سید نا سوج انا ورندی ٹی پارلیمانی سیکرٹری سمندر پار پاکستانیز و شون انسانی وسیلہ شفقت بلوچ پارے کہ 1971ءآن 2016ءاسکان 77 ہزار 190 پاکستانی ملائیشیا غا ہنار۔ 2016ءٹی ملائیشیا ایلو ملک آتیان کارندہ غاتا درآمد آ پابندی ئِ ہرفینے۔ شفقت حیات پارے کہ وزارت افرادی واک ئِ ودفنگ کن پاکستان اوورسیز ایمپلائمنٹ پروموٹرز ایسوسی ایشن، نیشنل ووکیشنل وٹیکنیکل ٹریننگ کمیشن، صوبائی ٹیکنیکل ایجوکیشن ووکیشنل ٹریننگ اتھارٹیز و بیوروآف امیگریشن و اوورسیز ایمپلائمنٹ نا باسک آتیا تالان اسہ کمیٹی اس اڈ تسنے۔ او پی ایف نا جوائنٹ سیکرٹری اونا سروک ئِ۔
