اسلام آباد۔ 28ستمبر (اے پی پی) بحرین نا وزیراعظم پرنس خلیفہ بن سلیمان الخلیفہ پارینے کہ او پاکستان ئِ تینا اُرا تکک و ہڑتوم آ ملک آتا نیام اٹ ہڑتوم آ کنڈآتا تعلقداری ٹی پین ودیکی و بڑزکو کہولی دورہ غاتیان ننا تعلقداریک پین مون آ کارہ۔ او تدوک آ دے وزیر واپار خرم دستگیر خان و بحرین اٹی پاکستان نا سفیر جاوید ملک تون اوڑدہی نا وخت آ ہیت وگپ کریکہ۔ وزیر واپار اولیکو پاکستان بحرین بزنس کانفرنس ناشریک کماشی کن بحرین نا دورہ غائس ہراٹی شاہی خاہوت نا باسک آتون اوار تقریباََ 500 مندوبین آک شرکت کریر۔ کانفرنس اٹی ہڑتوم آ ملک آتا وزیر واپار ، چیمبر آف کامرس نا صدرآک، بحرین و خلیجی علاقہ نا بھلا واپاری رڑتا مالک آک ، چیف ایگزیکٹو افسرآک ہم شرکت کریر۔ سفیر جاوید ملک پارے کہ بحرین نا دورہ نا وخت وزیر واپار نا جم و جوش اٹ خیرمقدم پاکستان و بحرین نا نیام اٹ ودوک آ تعلقداری تا مظہر ئِ ہراٹی معاشی کمکاری آ توجوہ تخنگا۔ وزیر واپار بحرین نا وزیراعظم ئِ وزیراعظم محمد نواز شریف نا نیک است خواہی تا کلہو ئِ سرکرے۔ اوپارے کہ پاکستان بحرین تون تعلقداری تے بھاز اہمیت ایتک۔ اوبحرین نا وزیراعظم ئِ پاکستان نا معیشت نا مثبت ٹک و تدینگوک آ مسہ سال اٹی ودوک آ سوگوی و شون آن ہم معلومدار کرے۔ سفیر جاوید ملک اودے پاکستان بحرین کانفرنس بابت آن معلومدار کرے ہرانا بحرین نا وزیراعظم بھاز ستائِ کرے۔ بحرین نا وزیر واپار زیدالزیانی و شاہی خاہوت نا باسک آتون اوار بحرین نا وزیراعظم نا آفس نا سینئر کمامدار آک ہم اوڑدہی نا وخت آ ساڑی ئسر۔
