اسلام آباد۔ 28ستمبر (اے پی پی) بنجائی وزیر ڈٹ بندی و شون اصلاحات پروفیسر احسن اقبال پارینے کہ جے سی سی نا بروک آ دیوان نومبر نا آخیر ی ہفتہ ٹی مریک، اقتصادی راہداری ڈٹ پاکستان و چین نا تعلقداری تے استارتسکان سرکیک، 46ارب ڈالر نا چینی زرکاری پاکستان نا تاریخ نا غٹ آن بھلا زرکاری مریک، 18 ارب ڈالر نا ڈٹ عملدرآمد آ بسنے وخت اس کہ 17ارب ڈالر نا ڈٹ پیپ لین اٹی ئِ۔ داخیال آتا درشانی ئِ او بیجنگ اٹی چینی میڈیا تون ہیت و گپ کرسا پارے۔ بنجائی وزیر پارے کہ 46ارب ڈالر نا چینی زرکاری پاکستان نا تاریخ نا غٹ آن بھلا زرکاری ئِ ہراٹی 18 ارب ڈالر نا ڈٹ عملدرآمد آ بسنو وخت اس کہ پین 17 ارب ڈالر نا ڈٹ آتیا کاریم جاری ئِ ، داڑآن بیدس ارب آ روپئی نا ڈٹ پاکستان نا بجٹ آن پورو کننگ انگ ئُ۔ اوپارے کہ نومبر 2016ءٹی چھٹی جائینٹ کوارڈینیشن کمیٹی نا دیوان اڈتننگ آ اتفاق مسنے دا دیوان اٹی اقتصادی راہداری نا بروک آ روڈ میپ ئِ منظور کننگک ہراٹی صوبہ غاتا نمائندگی ہم مریک۔ اوپارے کہ جے سی سی نا بروک آ دیوان نومبر نا آخیری ہفتہ ٹی مریک۔ جے سی سی آن مست گوادر، ٹرانسپورٹ و صنعت اٹی کمکاری نا ورکنگ گروپس آتا اوڑدہی ئِ کننگک تانکہ اوفتا سفارشات آتے جے سی سی نا بشخ جوڑ کننگ مریک۔ بنجائی وزیر احسن اقبال نا پاننگ ئس کہ سی پیک نا تغ حقیقت نا کنڈا ہِننگ ئِ ۔ سی پیک نا رداٹ غٹ توانائی نا ڈٹ آتیا کاریم ترندی اٹ مننگ ئِ و غٹ ڈٹ آک تینا تخوک آ وخت اٹی پایہ تکمیل اسکان سرمریرہ۔ اوپارے کہ چین کراچی آن پشاور ریلوے لین نا اپ گریڈیشن کن 5.5ارب ڈالر نا رعایتی کڑز آتا فراوانی آ اتفاق کرینو، دا ڈٹ ٹرین آتا رفتار ئِ 80 کلو میٹر آن ودفسا 160 کلو میٹر فی گھنٹہ ودفک۔ اوپارے کہ گوادر نا ڈٹ آتا منظوری نا عمل ئِ ترند کننگ آ چین نا اتفاق مسنے۔ اوپارے کہ چینی آزموندہ آن استفادہ کن اربن پلاننگ ، دیہی شون، سمال بزنس، آبی وسیلہ غاتا رکھ، و انڈسٹریل زونز انا سرحال آتیا تربیتی ورکشاپس اڈ تننگک۔
