پاکستان روہنگیا مسلمان تا بابت تینا کڑد ئِ ادا کننگ ئِ
اسلام آباد۔28ستمبر (اے پی پی) وزیراعظم نا سلاہکار خارجہ امور سرتاج عزیز پارینے کہ یورپ اٹی راستیکو کوپہ نا السی تحریک و اسلاموفوبیا نا اسہ مخصوص رجحان اس مو ن آ بسنے، او آئی سی او رجحان آتیا سخت نظر تخانے۔ روہنگیا نا بابت او آئی سی تینا نمائندہ ئِ گدریفیسس ہرانا رپورٹ زوت رسینگک۔ پاکستان روہنگیا مسلمان تا بابت تینا پبی کڑد ئِ ادا کننگ ئِ۔ ہموڑے داسا جمہوری حکومت بننگ آن گچینی نا اومیت ارے۔ چارشنبے آ قومی اسمبلی ٹی وقفہ سوج آتا وخت منزہ حسن نا سوج انا ورندی ٹی سلاہکار خارجہ پارے کہ اسلامی فوبیا بھاز ودانے ہندن ہندن دہشت گردی نا واقعہ غاک مریرہ الزام تراشی مریک۔ گڑاس ملک آتیٹی مسلمان آتون امتیازی سلوک زیات ئِ۔ دا مچ آ اسلامی دنیانا معاملہ ئِ۔ او آئی سی نا تدوک آ دیوان اٹی اوڑآ اسہ پورو سیشن اس مس مذہب نا پن آاسہ کمیونٹی اسے ہم ہراساں کننگپ۔ عذرا افضل نا سوج انا ورندی ٹی اوپارے کہ میانمر نا روہنگیا مسلمان تے کن نن اوآئی سی ٹی توار چست کرینن۔ او آئی سی اسہ خصوصی نمائندہ اس جوڑ کرے، اودورہ ہم کرے ، اونا رپورٹ بریک۔ پاکستان روہنگیا نا بابت تینا پورو کڑد ئِ ادا کننگ ئِ۔ شکیلہ لقمان نا سوج انا ورندی ٹی سرتاج عزیز پارے کہ داوخت 242اوغانستان ، 42بنگلہ دیش، 231بھارت ، 9مالدیپ، 28 نیپال و 82پاکستانی سری لنکا ٹی بندی ئُ۔ ننا سفارت خانہ ٹی ویلفیئر آفیسر ہراڑے گرج مس اوفتا کمک ئِ کیک۔ سزا پورو کروک آتے دستاویزات ترسا وطن آ پدی گدریفک۔ بھارت اٹی دزگیر پاکستانی تیا غیر کانودی بارڈر پار کننگ و زیات اڈکننگ نا دوبہ ئِ۔ اوغانستان اٹی نیٹو نا زیر حراست بگرام اٹی بندی اوٹی اوار افس۔ دا عمومی وڑنا مریک۔ اوٹی دُزی ، اسہ ایلو نا جھگڑہ زیات اڈ کننگ نا زیات کیسز ئُ۔
