بلوچستان اٹی سیکورٹی ادارہ غاتا کنڈآن کلیئرنس آ بھلو ٹورنامنٹ اس کرفینہ
اسلام آباد۔ 28 ستمبر (اے پی پی) بنجائی وزیر بین الصوبائی رابطہ ریاض پیرزادہ پارینے کہ پاکستان فٹ بال فیڈریشن نا اِرا متوازی تنظیم تا نیام اٹ شدید تنازعہ نا سوب حکومت و پاکستان سپورٹس بورڈ فیڈریشن نا انتظامی و مالی امداد ئِ پدی ہلکونے۔ حکومت ملک اٹی گوازی تا مون آ دننگ کن نمان گام گیج چست کننگ ئِ، بلوچستان اٹی سیکورٹی ادارہ غاتا کنڈآن کلیئرنس آ بھلو ٹورنامنٹ اس کرفینہ۔ چارشنبے آ قومی اسمبلی ٹی وقفہ سوج آتا وخت طاہرہ اورنگزیب نا سوج انا ورندی ٹی ریاض پیرزادہ پارے کہ پاکستان اسپورٹس بورڈ تینا اڈہلنگ نا مقصد نا دوئی کن سخت خواری کننگ ئِ۔ اسپورٹس نا بشخ ہم صوبہ غاتے گدریفنگا۔ نن پنی گوازی گر آتا جان جوڑی یا ایلو اہم گرج آتے پورو کننگ کن فنڈ قائم کرینن۔ پاکستان کرکٹ اٹی پوسکنو ٹیم اس ایسونن۔ ورلڈ کپ نا تیاری ئِ کننگ ئِ۔ برطانیہ نا دورہ گچین مس۔ ہاکی ٹی گچینی کن گام گیج کننگ اُن۔ اخس کہ نن اسپورٹس آ خلنگ اُن مسکوہی دور اٹی متنے۔ نن قائد اعظم ٹرافی نا انعقاد ئِ کرفین، 25ہزار ورنا گوازی گرک شرکت کریر۔ پاکستان اٹی تاریخ اٹی اولیکو وار دا سول ادارہ غاتا کنڈآن مسنے۔ اسپورٹس نا بحالی کن حکومت نا گام گیج آک است بڈ ئُ۔ ہاکی نا کیمپ اس خلنگ اُن ہراڑکن فنڈنگ بنجائی حکومت کیک۔ نسیمہ حفیظ پانیزئی نا سوج انا ورندی ٹی ریاض پیرزادہ پارے کہ بلوچستان اٹی نیشنل گیمز نا بھلا پروگرام طے شدہ ئس واہم ہموڑے دہشت گردی نا واقعہ غان پد اودے منسوخ کننگا۔ ہندن کہ سیکورٹی ادارہ غاک کلیئرنس ایترہ نن ہموڑے بھلو ٹورنامنٹ اس اڈ ترفینہ۔
