سی پیک پروجیکٹس آ عملدرآمد جاری ئِ ، ریلوے ہڑتوم آ ملک آتا نیام اٹ واپار نا اہم ئُ ذریعہ اس ثابت مریک
اسلام آباد۔ 27ستمبر (اے پی پی) بنجائی وزیر ڈٹ بندی و شون و اصلاحات پروفیسر احسن اقبال پارینے کہ سی پیک پروجیکٹس آ عملدرآمد جاری ئِ و ریلوے ہڑتوم آ ملک آتا نیام اٹ واپار نا اہم ئُ ذریعہ اس ثابت مریک، وزیراعظم نواز شریف دا ڈٹ آتیا پیش رفت نا ذاتی وڑاٹ جاچئِ ہلنگ ئِ ہراٹی توانائی و شاہرات آتا ڈٹ آک ہم اوارو ہرا 2017-18 ءٹی پورو مریرہ۔ داخیال آتا درشانی ئِ او سے شنبے آ بیجنگ اٹ چین نا نیشنل ریلویز ایڈمنسٹریشن نا ایڈمنسٹریٹر لوڈانگ فو تون اوڑدہی نا وخت آ کرے۔ بنجائی وزیر احسن اقبال پارے کہ کراچی آن پشاور ریلوے لین نا اپ گریڈیشن تون اوار گڑاس پوسکنا ڈٹ آتیا مذاکرات کننگانے۔ اوپارے کہ سی پیک پروجیکٹس ئِ اولین اولیت تننگ انگ ئِ ۔ اوپارے کہ سی پیک آن ڈیہہ ٹی شون نا پوسکنا کسراک ملنگرہ و ہمسایہ ملک آتے چین اتون ہڑزان دام واپار کننگ اٹی کمک رسینگک۔ اوپارے کہ دا ڈٹ آتا رداٹ چین وپاکستان نا نیام اٹ توانائی و انفراسٹرکچر نا کیہی ڈٹ آتیا ترندی اٹ کاریم مننگ ئِ ہراٹی کیہی ڈٹ 2017-18ءاسکان پورو مریرہ۔ داوخت آ چین نا وزیر ریلوے بنجائی وزیر احسن اقبال نا سی پیک نا ڈٹ انا سرسہبی کن اونا ذاتی است خواہی و کوشست آتا ستائِ کرے۔ اوپارے کہ سی پیک ڈٹ انا سرسہبی کن بنجائی وزیر نا کوشست آک ستاکڑزرہ۔ بنجائی وزیر ڈٹ بندی احسن اقبال دا دے تیٹی پاک چین اقتصادی راہداری نا بابت گڑاس اہم ڈٹ آتیا مذاکرات کن مسہ دے ئی سرکاری دورہ غا بیجنگ اٹی ئِ ۔
