اسلام آباد۔ 27ستمبر (اے پی پی) بنجائی وزیر ریلوے خواجہ سعدرفیق بنجائی وزیر ڈٹ بندی و شونتری احسن اقبال تون اوار چین انا نیشنل ریلویز ایڈمنسٹریشن نا ایڈمنسٹریٹر لوڈانگ فو تون اوڑدہی کریر۔ وزیر ریلوے ہرا دادے تیٹی چین نا دورہ غاٹی ئُ ہڑتوم آ ملک آتا نیام اٹ ریلوے نا بشخ اٹی کمکاری خاص کر ایم ایل ون، کراچی، پشاور ریلوے پروجیکٹ آ ہیت وگپ کریر و اومیت ظاہر کریر کہ دا ڈٹ آ ترندی اٹ کاریم مریک ہرا بلٹ ٹرین سپیڈ تون پورو کننگک۔ اوپارے کہ ریلوے پروجیکٹ سی پیک کمیونیکیشن انفراسٹرکچر ز نا بنداوی بشخ ئِ و علاقائی رابطہ غاتے کن بھاز اہمیت تخک۔ اوڑدہی نا وخت ایم ایل ون کراچی پشاور ریلوے پروجیکٹ تون اوار ریلوے نا کیہی ڈٹ و اوفتے آ ترندی اٹ عملدرآمد نا جاچ ئِ ہلنگا۔ لوڈانگ فو پارے کہ سی پیک آ بھلو پیش رفت اس مننگ ئِ ہرا ہڑتوم آ ملک آتا نیام اٹ دوستانہ تعلقداری نا عکاس ئِ ہراڑآن ڈیہہ ٹی زبردست معاشی شون مریک۔ داوخت آ چین اٹی پاکستانی سفیر مسعود خالد، وزارت ریلوے نا بڑزکو کمامدار و چین نا بڑزکو کمامدار آک ہم ساڑی ئسر۔
