اسلام آباد۔ 26ستمبر (اے پی پی) پاک چین اقتصادی راہداری ڈٹ انا رداٹ 14ارب ڈالر نا خڑچ آن 30 ڈٹ آتیا کاریم ترندی اٹ جاری ئِ۔ دا ڈٹ چین نا صدر شی جن پنگ نا وژن نا عکاس ئِ۔ پاکستان اٹی چینی سفارت خانہ نا ڈپٹی چیف آف مشن برولی جین پارینے کہ سی پیک ڈٹ انا رداٹ بناءکروک آ سی ڈٹ آتیان 16ڈٹ پوروی نا مرحلہ غاتیٹی پترینگانو۔ دا ڈٹ جاٹ 2018ءٹی وخت اس کہ ہائیڈرو پاور پروجیکٹ 2020ءٹی پورو مریک۔ پروجیکٹ کمامدارآک اے پی پی ئِ پاریر کہ 2017ءٹی توانائی نا گڑاس ڈٹ پورو مریرہ ہرافتے ٹی ساہیوال کول پاور پروجیکٹ ہم اوارے داڈٹ آ 70 درسد کاریم مسنے ہراڑآن بروک آ سال جون اٹی بجلی نا باقاعدہ پیداوار شروع مریک اوپارے کہ پورٹ قاسم پاور پروجیکٹ و داﺅد ونڈ پاور پروجیکٹ ہم زوت پورو مریرہ۔ اوپارے کہ چینی صدر نا کنڈآن پڑو کروک سلک روڈ فنڈز انا رداٹ کروٹ ہائیڈرو پاور پروجیکٹ آ ہم کاریم جاری ئِ۔ اوتوانائی نا کیہی ڈٹ آتیا کاریم نا رفتار ، ٹرانسپورٹ، ڈھانچہ ، روڈ آتا جوڑ جاڑ آ است جمی نا درشانیئِ کرے۔ اوپارے کہ کراچی لاہور موٹروے نا سکھر۔ملتان سیکشن آ چین نا غٹ آن بھلا جوڑجاڑی کمپنی کاریم کننگ ئِ داڈٹ انا رداٹ ہندی کہول آ 10 ہزار نوکری تا وارخواہی فراوان مسنے۔
