اسلام آباد۔ 26ستمبر (اے پی پی) صدر مملکت ممنون حسین پارینے کہ ہرڈول نا زور ئِ اسہ پلو تخسا بدعنوانی نا چٹفنگ کن کاریم کننگ المی ئِ انتئے کہ کرپشن اسہ جہانی ئُ ویل اسے ہراڑآغٹ ملک آتے اواری اٹ حکمت عملی اس جوڑ کروئی مریک۔ او داہیت ئِ دوشنبے آ سویلی ایشیائی ملک آتا تنظیم”سارک“ انا مندوبین آتون ہیت وگپ نا وخت آپارے ہراٹی بھوٹان، بھارت، مالدیپ ، نیپال و سری لنکا آن بیدس ایلو باسک ملک آتا مندوبین آک ہم شریک ئسر۔ دا ڈل قومی احتساب بیورو (نیب) انا کنڈآن کرپشن نا چٹفنگ کن اڈ تروک آسیمینار اٹی شرکت کن پاکستان نا دورہ غاٹی ئُ۔ اوڑدہی ٹی چیئرمین قومی احتساب بیورو قمر زمان چوہدری و بڑزکو کمامدارآک ہم شرکت کریر۔ صدر مملکت پارے کہ سویلی ایشیائی ڈیہہ اقتصادی لائخی و وسیلہ غاتا اعتبار آن اسہ اہم ئُ ڈیہہ اسے۔ اوپارے کہ شون ہلوک ملک آتیٹی بدعنوانی نا سوب وسیلہ غاتا زیان تشویشناک ئِ۔ صدر مملکت پارے کہ نیزگاری نا چٹفنگ و سارک ملک آتا الس نا شون اکن بدعنوانی نا چٹفنگ بے کچ المی ئِ۔ صدر مملکت پارے کہ بدعنوان عنصر آتے ضرور ہلنگے ولے اوفتا برخلاف کروک آ گام گیج آتا وخت واک آتے احتیاط اٹ کاریم اٹ اتنگے تانکہ بے قصور بندغ آک نشانہ جوڑمننگ آن محفوظ مریر۔ اوپارے کہ سارک ملک آتے بدعنوانی نا چٹفنگ کن تینا تینا آزموندہ غاتیٹی اسہ ایلو ئِ شریک کروئی مرے تانکہ بدعنوان عنصر آتے زوت پایہ تکمیل اسکان سرکننگ کن کروک آ گام گیج آتیٹی ترندی بننگ کے۔ صدر مملکت پارے کہ جہانی برادری تینا وسیلہ غاتے بچفنگ کن بدعنوانی نا چٹفنگ آ یکسوئُ و اوٹی ہچ وڑنا رعایت تننگپک۔ اوپارے کہ حکومت ملک اٹی کرپشن نا چٹفنگ کن ہروڑنا کوشست کننگ ئِ۔ داچرجوئی ٹی بے پرخ کارروائی کننگ انگ ئِ انتئے کہ پاکستانی حکومت کرپشن نا چٹفنگ کن سنجیدہ ئِ۔ حکومت نا گچین معاشی پالیسی تا سوب جہانی ادارہ غاک پاکستان نا گام گیج آتا ستائِ کرینو۔ اوپارے کہ حکومتی ادارہ غاتیٹی کرپشن نا چٹفنگ و شفافیت اتنگ کن حکومت اہم گام گیج کرینے۔ صدر مملکت دا عزم انا اعادہ ئِ کرے کہ پاکستان ایشیائی ملک آتون معاشی و راجی سوگوی کن تینا کڑدئِ ادا کرسا کیک۔ اوپارے کہ سارک ملک آتیٹی بدعنوانی نا چٹفنگ کن باسک ملک آتا سیمینار وخت انا اہم گرج ئِ۔ ڈل صدر مملکت نا منت واری ئِ ادا کرے و پارے کہ او پاکستان تون تعلقداری تے بھاز قدر انا نظر اٹ ہریرہ و ڈیہہ ٹی امن کن تینا کوشست آتے برجاءتخرہ۔
