اسلام آباد۔ 22ستمبر (اے پی پی) بلوچ رابطہ اتفاق تحریک (برات) نا سروک مسکوہی بنجائی وزیر پرنس محی الدین بلوچ پارینے کہ بھارتی سروک ئِ بلوچستان نا تہہ نا معاملہ غاتا بابت بیان بازی آن پاناد کروئی مرے۔ پنچ شنبے آ جاری بیان اٹی اوپارے کہ تحریک پاکستان نا وخت آ بلوچ الس و سروک آک اسہ اہم کڑد اس ادا کریر و وطن نا یکجہتی و سالمیت کن بے مثل قربانی تسر۔ بلوچستان نا بارواٹی گڑاس بھارتی سیاستدان تا بیان آتا حوالہ ئِ ترسا اوپارے کہ بلوچستان نا معاملہ غاتیٹی ہندوستان نا اوار مننگ نا ٹھوس شاہدی ساڑی ئِ و بلوچستان نا حالیت آتے خراب کننگ اٹی بھارت براہ راست اوڑدہ ئِ، اصل ہیت دادے کہ بھارت بلوچستان نا تہہ نا معاملہ غاتیٹی نیام تمسا مچ آ دنیا نا خن تے مقبوضہ کشمیر اٹی تینا بیدادی آن اسہ پلو کننگ خواہنگ ئِ۔ اوپاکستان نا بلوچ آتا کنڈآن قربانی تا تاریخ ئِ مون آ تخسا پارے کہ تحریک آجوئی نا وخت آ قائد اعظم محمد علی جناح وگودی فاطمہ جناح نا دورہ قلات نا وخت خان آف قلات میزبانی نا فرض ئِ سرانجام تس و رضاکارانہ وڑاٹ ملک ئِ سوگو کننگ کن ریاست قلات ئِ ضم کننگ نا پڑو ئِ کریسس۔ اوپارے کہ بلوچ الس محب وطن ئُ ہراک ہمیش پاکستان ئِ شون ہلوک و شونہال ریاست اس جوڑ کننگ کن غٹ کوشست آتا مخ تفی ئِ کرینو۔ پرنس محی الدین بلوچ پارے کہ نن بلوچستان نا گچینی کن کاریم کرسا کینہ و داپلیٹ فارم آ غٹ بلوچ قوم تے یکجا کننگ کن غٹ لائخی تے کاریم اٹ اتینہ۔ اوپارے کہ پاک چین اقتصادی راہداری ڈٹ آن استفادہ دوئی کننگ کن بلوچستان نا ورنانسل ئِ تکنیکی تربیت تننگے۔
