اسلام آباد۔ 22ستمبر (اے پی پی) بنجائی وزیر ڈٹ بندی، شون و اصلاحات پروفیسر احسن اقبال پارینے کہ حکومت تعلیمی بشخ اٹی اولیتی بنداو تیا گام گیج کننگ ئِ۔ بڑزکو تعلیم نا مون آ دننگ کن ہر ضلع ٹی کیمپس یا سب کیمپس اڈ تننگک۔ داخیال آتا درشانی ئِ او پنچ شنبے آ بلوچستان یونیورسٹی آف انجینئرنگ اینڈ ٹیکنالوجی خضدار اٹی طالب علم آتون تران کرسا کرے۔ بنجائی وزیر پارے کہ حکومت ایچ ای سی نا بجٹ ئِ مسہ سال اٹی دوگنا کرینے و حکومت یونیورسٹی تیٹی تعلیم نا مون آ دننگ کن گچین گام گیج کننگ ئِ۔ اوپارے کہ بڑزکو تعلیم نا مون آ دننگ کن ہرضلع ٹی کیمپس یا سب کیمپس اڈتننگک ہراڑآن تعلیم نا معیار ئِ گچین جوڑ کننگ اٹی پین کمک رسینگک۔ او پارے کہ ملکی شون اکن ورناتے تینا مثبت کڑدادا کروئی مریک و دابابت بلوچستان نا ورناتے قومی دنگ اٹی اوار مرسا ملک ئِ مون آ دروئی مریک۔ اوپارے کہ سیاسی سوگوی و پالیسی تا تسلسل آن بیدس ہچ ئُ ملک اس شون ہلپک۔ اوپارے کہ سی پیک اسہ قومی ڈٹ اسے ہرانا غٹ آن زیات فائدہ بلوچستان نا الس ئِ مریک۔ اوپارے کہ ساڑی آ حکومت دا ڈٹ ئِ پورو کننگ کن اولیتی بنداو تیا گام گیج کننگ ئِ۔
