امریکہ ٹی رہینگوک پاکستانی برادری نا جنرل اسمبلی آن وزیراعظم نا تران آ ردعمل
اولیکو وار پاکستانی کسرشون اس نہ صرف کشمیر نا ویل ئِ اقوام متحدہ ٹی بھاز صفاوگچین وڑاٹ پیش کرے، حمید ملک
جہانی کسرشون آتے وزیراعظم محمد نواز شریف نا امن نا اڈتننگ نا کوشست آتون تفوئی مرے، فٹزجیرالڈلیوس
واشنگٹن ۔ 22ستمبر (اے پی پی) وزیراعظم محمد نواز شریف اقوام متحدہ نا جنرل اسمبلی آن تران نا وخت آ کشمیر نا ویل ئِ گچین وڑاٹ پیش کرینے ہراٹی او جہانی برادری آ زورشاغاکہ او بھلو وخت اسے آن جاری دا تنازعہ نا چٹفنگ کن تینا کڑد ئِ ادا کیر ، ہرانا وخت آ ہزار آ بے گناہ کودک کشمیری تے شہید کننگانے۔ امریکہ ٹی رہینگوک دنیا نا کیہی ملک آتا باتی و پاکستانی برادری وزیراعظم نا جنرل اسمبلی آن تران آن گڈ اے پی پی تون ہیت وگپ کرسا پارے کہ پاکستان نا سیاسی جماعت آتے تینا اختلافات آتے گیرام کرسا کشمیر نا ویل انا بابت حکومت نا کوشست آتیٹی کمک کروئی مرے تانکہ مقبوضہ کشمیر اٹی جاری بھارتی بیدادی آ جہانی توجوہ ئِ مبذول کرفنگ مرے۔ اوپارے کہ وزیراعظم تران نا وخت آ اقوام عالم آن خواست کرے کہ او بھارتی مقبوضہ کشمیر اٹی کشمیری تا لس خون نا جاست و پاست ئِ کرفے و دابابت اقوام متحدہ نا فیکٹ فائنڈنگ مشن ئِ مقبوضہ کشمیر آگدریفنگے۔ اوپارے کہ وزیراعظم جنرل اسمبلی آن تران نا وخت آ صفا کرے کہ پاکستان و بھارت نا دوران امن و ایمنی نا اڈتننگ کن کشمیر نا تنازعہ نا ایسری المی ئِ ہراڑکن اقوام متحدہ نا قرارداد آتیا عملدرآمد کرفنگے۔ واشنگٹن اٹی رہینگوک پنی کانود دان فٹز جیر الڈلیوس دابابت پارے کہ اولیکو وار کشمیر نا ویل ئِ بین الاقوامی فورم آ بے کچ گچین وڑاٹ پیش کننگانے۔ اوپارے کہ پاکستان نا ساڑی آ حکومت ڈیہہ ٹی امن و ایمنی نا اڈتننگ کن جامع گام گیج کننگ ئِ۔ اوپارے کہ وزیراعظم جنرل اسمبلی ٹی کشمیر نا ویل و بھارتی بیدادی ئِ صفا وڑاٹ پیش کرینے۔ اوپارے کہ جہانی کسرشون آتے وزیراعظم محمد نواز شریف نا امن نا اڈتننگ نا کوشست آتون تفوئی مرے و اگہ کشمیر نا ویل ئِ پرامن وڑاٹ ایسر کننگ تو تو داڑآن دنیا نا امن و ایمنی ئِ خطرہ مننگ کیک انتئے کہ پاکستان و بھارت ہڑتوم آک ایٹمی قوت ئُ۔ پاکستان لنک انٹرنیشنل نا صدر حمید ملک پارے کہ مچ آ پاکستانی امریکی برادری نواز شریف نا حکومت نا پشت آ سلوک ئِ و اوفتا پالیسی تا پبی مخ تفی ئِ کیک اوپارے کہ اولیکو وار پاکستانی کسرشون اس نہ صرف کشمیر نا ویل ئِ اقوام متحدہ ٹی بھاز صفا و گچین وڑاٹ پیش کرینے بلکن او بھارتی بیدادی نا برخلاف ثبوت ہم اقوام متحدہ ئِ پیش کرینے و پارینے کہ مقبوضہ کشمیر اٹی جولائی آن جاری ساڑی آ بیدادی نا واقعہ غاتیٹی بھارتی مقبوضہ فوجیک 100 آن زیات کودک کشمیری تے شہید کرینو وخت اس کہ ٹھپی مروک آتا کچ ہزارآتیٹی ئِ۔ وزیراعظم مقبوضہ وادی ٹی ساڑی آ شہیدی تا ثبوت ئِ ہم جہانی ادارہ نا مون آ تخانے۔ اوپارے کہ وزیراعظم جنرل اسمبلی ئِ پارینے کہ پاکستان مقبوضہ کشمیر اٹی بھارتی فوج انا انسانی حق انا پامالی تا ثبوت ئِ ہم پیش کننگ کیک ۔ اوپارے کہ 26ستمبر 2016ءآ بھارتی وزیر نا جنرل اسمبلی آن تران نا وخت آ پاکستانی امریکن و کشمیری برادری ٹی اقوام متحدہ نا ہیڈ کوارٹر نا مون آ برانز نا پروگرام اس مرتب کرینے تانکہ مقبوضہ کشمیر اٹی جاری ساڑی آ بیدادی واقعہ غاتا برخلاف تینا برانز ئِ رجسٹرڈ کرفنگ مرے و جہانی ادارہ ئِ باور کرفنگے تانکہ او کشمیری تا حق خودارادیت نا دوئی کن کروک آ تینا وعدہ غاتا پاسداری ئِ کے۔ پنی کشمیری کسرشون و امریکہ ٹی اڈہلوک ورلڈ کشمیر اویئرنس نا جنرل سیکرٹری ڈاکٹر غلام نبی فائی وزیراعظم نا ترا ن نا ستائِ کرسا حکومت پاکستان نا منت واری ئِ ادا کرینے ہرااقوام متحدہ نا جنرل اسمبلی ٹی بین الاقوامی کسرشون آتے کشمیر نا ویل آن معلومدار کرے و کشمیری تا اخلاقی و سفارتی کمکاری ئِ کرے۔ وزیراعظم محمدنواز شریف جنرل اسمبلی نا دیوان اٹی شرکت تون اوار اوار کیہی جہانی کسرشون آتون ہم اوڑدہی کرینے و اوفتے کشمیر ناویل آن معلومدار کرسا کودک کشمیری تیا جاری بھارتی بیدادی نا چٹفنگ کن اوفتا کمکاری طلب کرینے۔ جارج میسن یونیورسٹی نا اینی کیمرون و امریکن مسلم الائنس نا نیشنل ڈائریکٹر سلیم اختر بین الاقوامی کہول آ کشمیر نا ویل ئِ تالان کننگ نا چرجوئی ٹی وزیراعظم محمد نواز شریف نا کوشست آتا ستا ئِ کرینے۔ اوپارے کہ پاکستانی امریکن برادری پاکستانی امریکی برادری کودک کشمیری تیا بھارت نا ریاستی دہشت گردی نا مذمت ئِ کیک۔ کیہی پاکستانی امریکیک دابابت پارینوکہ وزیراعظم محمد نواز شریف کشمیر نا ویل ئِ تالان کننگ کن ہر پلیٹ فارم ئِ کاریم اٹ اتنگ ئِ و پاکستانی سیاستدان آتے مرے کہ او حکومت نا کوشست آتون تفر۔ اوغٹ سیاستدان آتیان خواست کرسا پارینے کہ تینا اختلافات آتے اسہ پلو تخسا حکومت تون متعدد مریر و مچ آ دنیا ئِ اسہ صفا ئُ کلہو اس ایتر کہ مچ آ پاکستانی قوم تنازع کشمیر نا ایسری ئِ خواہک ۔
(ع۔نس۔ز۔م)
