اسلام آباد۔ 22ستمبر (اے پی پی) سیاسی کسرشونک پارینو کہ وزیراعظم محمدنواز شریف اقوام متحدہ نا جنرل اسمبلی ٹی تینا تران اٹی کشمیر نا تنازعہ نا بارواٹی پاکستانی موقف و کشمیری الس نا است خواہی تا پبی ترجمانی ئِ کرینے۔ اقوام متحدہ کشمیر نا تنازعہ نا ایسری و مقبوضہ کشمیر اٹی بنداوی انسانی حق انا سنگین خلاف ورزی تا توننگ کن تینا کڑد ئِ ادا کے۔ پاک فوج و مچ آ پاکستانی قوم بھارت نا ہر بیدادی نا منہ توڑ ورندی ئِ تننگ کن تیار ئُ۔ داخیال آتا درشانی ئِ اوفک پنچ شنبے آ اے پی پی تون خصوصی ہیت وگپ کرسا کریر۔ پاکستان مسلم لیگ (ن) نا باسک قومی شنرافاطمہ خواجہ پارے کہ وزیراعظم محمد نواز شریف اقوام متحدہ نا جنرل اسمبلی آن تینا تران اٹی کشمیر نا ویل ئِ پبی وڑاٹ جہانی برادری نا مون آ چست کرے۔ وزیراعظم جوان وڑاٹ جہانی برادری ئِ پارے کہ نن پرامن وڑاٹ کشمیر نا تنازعہ تون اوار غٹ ویل آتا ایسری ئِ خوانہ جہانی برادری ئِ اقوام متحدہ نا قرارداد آتا رداٹ ایسر کننگ کن بھارت آ زور شاغنگے۔ جہانی برادری ئِ مقبوضہ کشمیر اٹی بھارتی فورسز آتا حق انا سنگین خلاف ورزی تا نوٹس ئِ ہلوئی مرے اوپارے کہ ننا فوج و کل قوم بھارتی بیدادی نا پبی ورندی ئِ تننگ کن تیار متحدئُ۔ واہم نن ڈیہہ تون اوار مچ آ دنیاٹی امن نا خواہندار اُن و نن جنگ اٹی پہل کپنہ۔ پاکستان پیپلز پارٹی آن تعلق تخوک آ سینیٹر تاج حیدر پارے کہ اقوام متحدہ ٹی صرف زبانی ہیت کننگ آن بیدس کشمیر نا تنازعہ نا گڈیکو دروشم ئِ کشوئی مرے۔ پاکستان و بھارت اقوام متحدہ ٹی کشمیر نا تنازعہ ئِ ایسر کننگ آ اتفاق کرینو ولے بھارت اقوام متحدہ نا قرارداد آتیا عملدرآمد اٹی گھبرائنگ انگ ئِ۔ اقوام متحدہ نا قرارداد آتیا عملدرآمد انت اکن کننگ پننگ ئِ۔ کوسو و تون اوار ایلو جہانی تنازعہ غاتے ایسرکننگانے ولے دا تنازعہ ئِ ایسر کننگ اٹی اڑاند آتے مر کننگ نا کوشست انت اکن کننگ پننگ ئِ۔ بھارت ئِ زمہ واری نا درشانی ئِ کروئی مرے بھارت اٹی ہموڑے شون پسند واک آک داویل انا ایسری ئِ خوارہ اوپارے کہ جہانی برادری ئِ کشمیر نا تنازعہ نا ایسری آن تیناکڑد ئِ ادا کروئی مرے۔
