اسلام آباد۔ 22ستمبر (اے پی پی) صدر مملکت ممنون حسین پارینے کہ کشمیری الس نا حق خودارادیت ئِ ملوک آ است اٹ امنا کننگے تو ڈیہہ نا فضا سازگار مریک و او ہمو وسیلہ غاک ہرا داوخت آ اختلافات آتے تہو تننگ کن کاریم اٹی اتنگ انگ ئُ، انسانی شرحالی کن کاریم اٹ اتنگ مریرہ ۔ ڈیہہ ٹی پائیدار امن کن کشمیر نا ویل انا ایسری بے کچ المی ئِ و دا ویل ایسری آن بیدس ڈیہہ ٹی امن اسہ تغ اسے۔ داہیت ئِ او پنچ شنبے آ فاطمہ جناح ویمن یونیورسٹی نا کنڈآن ”جہانی کانفرنس برائے امن و سلامتی سویلی و نیامی ایشیائ“نا سرحال آن اڈ تروک آ کانفرنس نا بنائی سیشن آن تران کرسا پارے۔ کانفرنس اٹی چیئرمین بڑزکو تعلیمی کمیشن ڈاکٹر مختار احمد و وائس چانسلر فاطمہ جناح وویمن یونیورسٹی ڈاکٹر ثمینہ امین قادر ئسک ہم تران کریر۔ صدر مملکت پارے کہ ڈیہہ نا شون و شونہالی کن منفی طرز عمل آن پاناد کروئی مریک تانکہ وسط ایشیاو سویلی ایشیانا الس نا مفاد اٹی کمکاری و شون نا عمل ترندی اٹ مون آ کائے۔ پاکستان د امقصد کن غٹ ہمسایہ ملک آتا نیام اٹ جغرافیائی قربت ئِ اسہ مثبت و ترند رفتار شریداری ٹی بدل کننگ کن پرعزم ئِ۔ صدر مملکت پارے کہ پڑوسی ملک آتے مسکوہی نا ویل آتیٹی پلویڑ مننگ آن بیدس ڈیہہ نا شون اکن مون آ بروئی مریک تانکہ ننا بروک آ نسل انا آخبت گچین مننگ کے۔ صدر مملکت پارے کہ تین پہ تینی اختلافات و تنازعہ غاتا ایسری نا گچین وڑہندادے کہ تین پہ تینی پت اٹی ودکی کن نیک نیتی اتون گام گیج کننگے تانکہ کمکاری و تین پہ تینی پت ہی ویل آتا ایسری اس کشنگ کیرہ۔ صدر مملکت پارے کہ مسکوہی منہ دہائی نا وخت پیش بروک آ دہشت گردی نا واقعہ غاتیان ننا ڈیہہ بھاز بے وڑ زہمی مسنے ولے پاکستان اونا پبی وڑاٹ مقابلہ ئِ کرینے۔ ننا پڑوسی ملک چین ننا قوم انا حوصلہ و وطن تون بے لوث مابت ئِ خنسا پاک چین اقتصادی راہداری نا دروشم اٹی ارب آ ڈالر نا معاہدہ کرینے۔ اوپارے کہ پاک چین اقتصادی راہداری اسہ کثیر المقاصد ڈٹ اسے ہرا ڈیہہ نا غٹ ملک آتے کن شون و شونہالی نا روشنائی ثابت مریک ہرانا نتیجہ ٹی الس نا زند انا آب بڑز مریک۔ صدر مملکت پارے کہ دا ڈٹ آن ڈیہہ ٹی روزگار نا وارخواہی دو بریک و ننا ملک شونہالی نا کسر آ روان مریک۔ صدر مملکت پارے کہ ننا ہمسایہ ملک خاص وڑاٹ نیامی ایشیائی ریاست آک داڈٹ اٹی است خواہی ہلنگ ئُ و اوٹی شریدار جوڑ مننگ نا خواہش مند ئُ۔ پاکستان دا سفر اٹی تینا غٹ پڑوسی ملک آتے شریک کننگ کن جامع حکمت عملی آ کاربند ئِ۔ اوپارے کہ پاکستان تینا منفرد محل و وقوع ، بے کچ قابل قدر افرادی واک و بھاز انگا ایلو خصوصیات آتا سوب ڈیہہ نا شون و امن و سوگوی کن قائدانہ کڑد ادا کننگ ئِ۔ صدر مملکت داوخت آ فاطمہ جناح یونیورسٹی نا کوشست آتا ستائِ کرسا پارے کہ دا یونیورسٹی نا کنڈآن بین الاقوامی کانفرنس نا اڈتننگ خوش آئند ئِ و اومیت ئِ کہ ڈیہہ نا کیہی قوم تا نیام اٹ مری تے کم کننگ و کمکاری نا کسرتے کشادہ کننگ کن داوڑنا گام گیج آک پین وخت اس ہم برجاسلرہ۔ اوپارے کہ داکانفرنس آن چاہندار تا نیام اٹ درشانِ خیال و رابطہ غاتا نتیجہ ٹی نیامی و سویلی ایشیا نا امن و شون و شونہالی کن بھاز انگا پوسکنا و مفید سلاہ مون آ بریک۔
