اسلام آباد۔ 21ستمبر (اے پی پی) وزیر مملکت و چیئرپرسن بی آئی ایس پی ماروی میمن ایشیائی شونداری بینک انا ڈل اتون اوار سویلی کوریا نا صوبہ گینگ وونڈو ٹی نیشنل ہیلتھ انشورنس سروس (این ایچ آئی ایس) نا دورہ ئِ کرے۔ این ایچ آئی ایس سویلی کوریا نا اسہ پنی سوشل پروٹیکشن ایجنسی اسے ۔ دورہ نا وخت آ چیئرپرسن بی آئی ایس پی پرائم منسٹر ہیلتھ انشورنس اسکیم کن آخبت اٹی حساب و کتاب یکجا کننگ کن این ایچ آئی ایس نا پٹ وپولی سروک ہونگ کیوب لی و ڈائریکٹر آئی آر پارک چون سک تون بی آئی ایس پی، وزارت جان جوڑی پاکستان و این ایچ آئی ایس نا نیام اٹ مفاہمتی یات داشت آتا گمان آ درشانِ خیال کرے۔ کوریا دنیا نا غٹ آن گچین ہیلتھ انفارمیشن کمیونیکیشنز ٹیکنالوجی(آئی سی ٹی ) نا نظام اس تیار کرینے۔ ہیلتھ بینکس ، وبائی ناجوڑی تیان بچنگ کن الارم سروس و علاقائی تخصیص ہیلتھ سروس نا تصورات آتا کمک اٹ، کوریا ملک انا ہر کونہ ٹی تینا آبادی نا جان جوڑی ئِ گچین جوڑ کرینے۔ کوریا ٹی ہر شاری کن اسہ شناختی نمبر اس مخصوص کننگک و ودی مننگ آن اونا انشورنس نا ادائیگی ٹی این ایچ آئی ایس ونڈ شاغک۔ گچین جان جوڑی نا حکمت عملی کن وقفہ وقفہ اٹ پٹ وپول کن نمونہ یکجا کننگک۔ داوخت آ چیئرپرسن بی آئی ایس پی پارے کہ شونہالی جان جوڑی راج اکن حساب وکتاب ئِ منظم کننگ بھاز المی ئِ۔ پاکستان کوریا نا 1963ءآن ہلیس2016ءاسکان نا دوئی کروک آزموندہ غاتیان ہیل کرسا اسہ سال اسے نا وخت اٹی تینا آبادی نا جان جوڑی ئِ گچین جوڑ کننگ کیک۔ بی آئی ایس پی نا ڈیٹاٹی اوار جان جوڑی، تعلیم، جنس، محل و قوع، شاری و خلقی پرخ کون آ عوامل آتے ملک انا ہر بشخ اٹی پٹ وپول و گچین جان جوڑی نا حکمت عملی تے کن کاریم اٹ اتنگ مریک۔ دنکہ اے ڈی بی نا شریداری نا رداٹ بی آئی ایس پی تینا امداد نا اسہ بشخ اس پرائم منسٹر ہیلتھ انشورنس اسکیم کن کاریم اٹ اتنگ کیک و اے ڈی بی کوریا نا این ایچ آئی ایس ئِ پاکستان کون آن شون ہلوک ملک آتا کمکاری نا موکل ایتک۔ دا عوامل آتے مون آ تخسا بی آئی ایس پی ، این ایچ آئی ایس و پرائم منسٹر ہیلتھ انشورنس اسکیم نا نیام اٹ کمکاری نا کمک اٹ دا ہدف ئِ دوئی کننگ مریک۔ قومی راجی و اقتصادی رجسٹری (این ایس ای آر) نا حامل مننگ نا ناطہ ، بی آئی ایس پی تون یونین کونسل نا بنداو تیا 27 ملین خاہوت آتا کثیر المیعاد ڈیٹا ساڑی ئِ۔ بی آئی ایس پی دا حساب وکتاب ئِ وزارت جان جوڑی ئِ تسنے ہرانا بنداو آ وزارت جان جوڑی ہیلتھ انشورنس کارڈ کن حقدار بندغ آتا پیدواری ئِ کرینے۔ این ایس ای آر نا رداٹ نیزگار و متوسط تپہ نا جان جوڑی نا بارواٹی زیات آن زیات معلومداری پالیسی ساز آتے کن مفید ثابت مریک و پاکستان ترندی اٹ معیشت نا اعتبار آن دنیا نا 18 گچین ملک آتیٹی اوار مریک۔ چیئرپرسن بی آئی ایس پی پارے کہ دا مناسب وخت آ بی آئی ایس پی ، وزارت جان جوڑی و این ایچ آئی ایس نا نیام اٹ دا معاہدہ وزیراعظم پاکستان نا پاکستانی الس نا جان جوڑی آن بابت تغ ئِ حقیقت اٹی بدل کیک۔
