اسلام آباد۔ 21ستمبر (اے پی پی) جاپان، آسٹریا و سوئٹزرلینڈ پاکستان تون تعلقداری تے پین سوگو کننگ و علاقائی و بین الاقوامی معاملہ غاتیا تین پہ تینی افہام و تفہیم ئِ مون آ دننگ آ اتفاق کرینو۔ دا امنائی چارشنبے آ نیو یارک اٹی یو این جنرل اسمبلی نا دیوان نا وخت آ سلاہکار خارجہ سرتاج عزیز و جاپان نا وزیر خارجہ فومیو کشیدہ، آسٹریا نا وزیر خارجہ سبسٹائن کورزو سوس وزیر خارجہ ڈائیڈر برہالٹر نا نیام اٹ جتا جتا اوڑدہی نا وخت آ خننگا۔ دفتر خارجہ نا ترجمان نا رداٹ ہر مسٹ آ ملک آتا وزیر خارجہ غاک دہشت گردی نا برخلاف مہم اٹی پاکستان نا قربانی تے امنا کرسا قبائلی و ملک انا ایلو بشخ آتیٹی سرسہبی اٹ جاری انسداد دہشت گردی آپریشن نا ستائِ کریر۔ سلاہکار خارجہ داوخت آ پارے کہ دا آپریشن تا نتیجہ ٹی ملک اٹی سیکورٹی نا حالیت آک گچین مسنو، ہراڑآن ملکی معیشت پائیدار کچ اتون شون نا کسر آ روان ئِ۔ اوجاپان ، آسٹریا و سوئٹزر لینڈ نا کنڈآن پاکستان اٹی زرکاری نا ستائِ کرے۔ سلاہکار خارجہ تینا جاپانی ، آسٹریا و سوئس ہم منصب آتے پاک بھارت تعلقداری و بھارتی مقبوضہ کشمیر اٹی حالیت آتا بابت بریف کرے۔ سرتاج عزیز مقبوضہ کشمیر اٹی بھارتی فورسز آتا کنڈآن انسانی حق انا خلاف ورزی تے تالان کرسا پارے کہ سویلی ایشیاءٹی امن و سوگوی کن کشمیر نا تنا زعہ اقوام متحدہ نا سلامتی کونسل نا قرارداد آتا رداٹ ایسر کننگ نا گرج ئِ۔ جاپان نا وزیر خارجہ فومیو کشیدہ پارے کہ جاپان تون تعلقداری تے بے کچ اہمیت ایتک۔ اوپاکستان اٹی توانائی سیکٹر اٹی زرکاری ٹی است خواہی نا درشانی ئِ کرسا ہڑتوم آ ملک آتا نجی سیکٹر نا است بڈی نا گرج ئِ۔ او سلاہکار خارجہ سرتاج عزیز ئِ جاپان نا دورہ نا سلہ ہم تس۔ آسٹریا نا وزیر خارجہ سبسٹائن سیکورٹی حالیت آتیٹی گچینی نا سوب پاکستان اٹی آسٹرین زرکاری نا خیرمقدم ئِ کرے و پارے کہ ہڑتوم آ ملک آتا نیام اٹ متبادل توانائی ٹی کمکاری نا نمان لائخی ساڑی ئِ۔ سوئس وزیر خارجہ ڈائیڈ پارے کہ سوس ڈویلپمنٹ کوآپریشن پاکستان اٹی تینا کاریم نا پنجا سال پورو کننگ ئِ۔ اوتینا ملک انا کنڈآن پاکستان ئِ واٹر مینجمنٹ سیکٹر اٹی کمکاری نا پیش کش کرے۔ سوئس وزیرخارجہ مسکوہی سی سال آن اوغان مہاجر آتا میزبانی آ پاکستان نا کڑد انا ستائِ کرے۔ اوڑدہی تا وخت آ نیو کلیئر سپلائرز گروپ کن پاکستانی درخواست و کشمیر و اوغانستان نا حالیت آتون اوار کیہی معاملہ غاتیا ہم شرہ کننگا۔
