اسلام آباد۔ 19 ستمبر (اے پی پی) غیر وابستہ ملک آتا تحریک (این اے ایم ) نا 17می سروکی دیوان وینزویلا ٹی اِرا دے برجاءسلنگ آن گڈ ایسر مس۔ دیوان نا وخت آ پاکستان مقبوضہ کشمیر نا الس نا حق خودارادیت کن جاری روا جہد ئِ ریاستی جبر نا کمک اٹ توننگ نا پبی مخالفت ئِ کرینے۔ دفترخارجہ آن دوشنبے آ جاری کروک آ بیان نا رداٹ 17 و 18 ستمبر 2016 ءآ وینزویلا ٹی اڈ ہلوک آ اِرا دے ئی سروکی دیوان اٹی پاکستانی ڈل انا سروکی ئِ وزیراعظم نا سلاہکار خارجہ امور سرتاج عزیز کرے۔ سروکی دیوان نا ایسری آ غیر وابستہ ملک آتا تحریک نا کنڈآن دہشت گردی نا چٹفنگ، حق خودارادیت نا حق، شام ، یمن ، اوغانستان و عراق نا حالیت آتا بابت اعلامیہ اس جاری کننگا۔ داوخت آ سلاہکار خارجہ مقبوضہ کشمیر نا ویل ئِ کشمیری الس نا است کواہی تا رداٹ ایسر کننگ آ زور شاغا ہرادے اقوام متحدہ نا سیکورٹی کونسل اٹی اوڑدہ کننگانے۔ اوپارے کہ سویلی ایشیاءٹی امن کن متنازعہ کشمیر نا چٹفنگ المی ئِ۔ اودیوان نا وخت آ بھارتی مقبوضہ جموں و کشمیر اٹی انسانی حق انا سنگین خلاف ورزی تا ویل ئِ ہم چست کرے۔ سرتاج عزیز ہر ڈول نا دہشت گردی نا ترندی اٹ مخالفت ئِ ہم کرے۔ دہشت گردی نا برخلاف جنگ اٹی پاکستان نا قربانی و دہشت گردی نا لعنت نا چٹفنگ کن کروک آ کوشست و دابابت ملوک آ سرسہبی تے مون آ تخسا اوپارے کہ پاکستان غیر وابستہ ملک آتے تینا آزموندہ غاتیان استفادہ کننگ نا سلہ خلیک۔ سلاہکار خارجہ پارے کہ این اے ایم نا اولیت آتے مرتب کننگ کن بڑزکو کہول انا کمیٹی اس اڈتننگے تانکہ شون ہلوک ملک آتا مفادات آتے رکھ فراوان کننگ مرے۔ سروکی دیوان اٹی کیہی ملک آتا سروک آک شرکت کریر ہراٹی ایران نا صدر حسن روحانی، زمبابوے نا صدر لوگابے ، کیوبا نا صدر رال کاستر و و فلسطینی صدر محمودعباس اوارئسر۔ جہانی کسرشونک این اے ایم نا احیا نا گرج آ زورشاغار و پاریر کہ واک انا کمک اٹ نیام تمنگ نا عمل بایدے چٹے۔ شام، عراق و اوغانستان نا حالیت آتا بابت اوقومی حکمت عملی نا رداٹ امن نا اڈتننگ نا گرج آ زورشاغا و داملک آتا علاقائی سلامتی و سالمیت آ زورشاغا۔ اوفلسطین نا الس آ مروک آظلم انا ہم مذمت ئِ کرے۔ وینز ویلا بروک آ مسہ سال اسکان این اے ایم تحریک نا سروکی ئِ کیک و 2019ءٹی آذربائیجان تنظیم نا سروکی ئِ سنبھالک۔
